OÉ-CUSSE, 12 jullu 2023 (TATOLI) – Departamentu Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), daudaun ne’e prepara ona blanku no mákina hodi halo produsaun ba karta kondusaun orijinál iha 2024.
Notísia relevante: DRTT Oé-Cusse presiza aumenta rekursu umanu no fasilidade
“Karta kondusaun daudaun ne’e sei uza provizória, razaun katak ita-nia blanku orijinál no mákina iha ona hela de’it orsamentu atu sosa kamera maka seidauk iha, kamera ne’e nia modelu hanesan rejistu sivíl notariadu uza, ne’ebé ita sei uza nafatin surat tahan mutin hanesan bainbain, maibé ida-ne’e provizória,” Xefe Departamentu RDTT Oé-Cusse, Silvestre Sila Teme, ba jornalista sira iha Oé-Cusse, kuarta ne’e.
Xefe Departamentu ne’e informa, responsabilidade atu sentraliza kamera ne’e hosi Autoridade RAEOA la’ós Governu Sentrál, maibé autoridade labele responde tanba ne’e tenke tau iha Planu Asaun Anuál (PAA).
“Tanba ha’u foin hetan nomeiasaun iha 2022, ha’u mai iha DRTT ne’e foin kompleta atinan ida iha fulan-maiu 2023 ne’e, entaun tinan ne’e ha’u tenke ajenda ona iha PAA 2024, atu tinan oin ita-bele sosa ona kamera ne’e, bainhira iha ona kamera, ita-bele uza ba produsaun karta kondusaun orijinál” nia afirma.
Nia fó-sai katak, tuir informasaun karta kondusaun ne’ebé prodús iha Oé-Cusse la vale iha kapitál Dili no promove komunikasaun entre Ministériu Transporte Terrestre no Komunikasaun (MTK) ho autoridade RAEOA.
“Tanba ne’e Autoridade maka prepara hodi halo produsaun, nune’e ita-bele responde no klarifika, tanba ami simu reklamasaun katak vale tanba logo ZEESM iha laran no la vale tanba karta produsaun ne’e provizória de’it,” nia katak.
Notísia relevante: Trimestre daruak 2023, DRTT Oé-Cusse kontribui rihun $23-resin ba kofre Estadu
Jornalista: Abílio Elo Nini
Editór: Evaristo Soares Martins
