iklan

HEADLINE, MUNISÍPIU, OÉ-CUSSE (RAEOA), SEGURANSA

PNTL sei koordena DRTT regula bisikleta elétrika sirkula iha Oé-Cusse

PNTL sei koordena DRTT regula bisikleta elétrika sirkula iha Oé-Cusse

Minoridade sira tula malu ho bisikleta elétrika hodi halo movimenta ba-mai iha kapitál Maliana, munisípiu Bobonaro. Imajen Tatoli/Sérgio da Cruz.

OÉ-CUSSE, 09 janeiru 2024 (TATOLI) –  Komandu Polísia Nasionál Timor-Leste (PNTL) sei koordena Departamentu Transporte Terrestre (DRTT) atu regula bisikleta elétrika hirak-ne’ebé sirkula iha Rejiaun Administrativa Espesiál Oé-Cusse Ambeno (RAEOA), tanba maioria labarik minoridade mak konduz la tuir regra tránzitu nian hodi movimenta iha estrada públiku.

Notísia relevante:PNTL Oé-Cusse prosesa sidadaun 20 ba Ministériu Públiku

Komandante PNTL Superintendente Nicolau Francelino da Costa, hateten, durante ne’e parte tránzitu seidauk halo atuasaun tanba seidauk iha orientasaun hosi Governu ho despaxu hosi komandu jerál.

“Maibé ida-ne’e ita haree daudaun sirkula livre, parte tránzitu mós iha ona planu halo sensibilizasaun hahú kedas iha tinan kotuk, atu informa ba komunidade sira atu haree ona sira,” Superintendente Nicolau Francelino da Costa, ko’alia iha Oé-Cusse, segunda ne’e.

“Agora tama 2024 ne’e, ita sei regula sidadaun ne’ebé kondus motorizada eléstrika ne’e, nune’e bele kumpri, tanba durante ne’e livre liu, maioria labarik minoridade la ho kapasete, sira ultrapasa estrada públiku,” Komandante PNTL Oé-Cusse ne’e promete.

Tanba ne’e  komandu PNTLOé-Cusse sei koordena ho parte DRTT Oé-Cusse, atu haree asuntu ne’e, presiza dokumentu ruma ka lae.

“Ita sei komunika ho Departamentu  Transporte Terrestre Oé-Cusse, atu haree, sira presiza dokumentu ka lae hanesan karta kondusaun ruma, no mós idade atu kondus, presiza 17 ba leten ka oinsá,  tanba ita haree kuaze hanesan klase ho motorizada sira,” nia katak.

Tuir nia, bainhira iha ona koordenasaun ho parte DRTT, maka komandu PNTL liuhosi seksaun tránzitu hahú hala’o ona pasa-revista, iha fatin públiku ba sira-ne’ebé kondus bisikleta elétrika.

“Tanba ita haree ikus-ikus ne’e motorizada listrik sirkula barak ona, labarik minoridade maka uza tuir espasu públiku, ida-ne’e fó perigu ba labarik nia vida, tanba transporte karreta ho motor aumenta-tán ho tum-tum barak ona,” nia fó hanoin.

Notísia relevante:PNTL Oé-Cusse kontribui $31,042.00 ba kofre Estadu

Jornalista: Abílio Elo Nini

Editórr: Evaristo Soares Martins

iklan
iklan

Leave a Reply

iklan
error: Content is protected !!