DILI, 23 Dezembru 2025 (TATOLI) –Timor-Leste sei komemora, iha 31 Dezembru, Loron Eroi Nasionál sira-nian, nune’e Arsebispu Arkidioseze Metropolitana Dili, Don Virgílio Kardeál do Carmo da Silva, SDB, konvida timoroan hotu atu halo reflesaun hodi banati tuir prinsípiu lutadór sira-nian.
Nia dehan, iha 31 Dezembru, nu’udar loron ikus no iha 01 Janeiru hanesan loron dahuluk tinan foun hanoin kona-ba loron Mundiál Pás nian.
“Ida-ne’e konvida ita hotu, uluk nana’in, atu aproveita tempu forte ida-ne’e, ba ita-nia reflesaun atu reflete ita-nia eroi sira ne’e nu’udar modelu ba ita”, nia hato’o iha Lesidere, ohin.
Tanba sira-nia sakrifísiu fó an ba rai ida-ne’e to’o país hetan liberdade, pás, interese povu no nasaun.
“Selebra loron ne’e atu reza ba eroi sira ne’ebé Na’i Maromak bolu ona, atu sira bele hetan duni fatin ne’ebé sira hein iha rai ida-ne’e atu moris iha Maromak, hetan grasa iha lalehan”, nia konvida.
No sira ne’ebé sei moris atu Na’i Maromak haraik nafatin ba sira-nia sabedoria atu lori sai nafatin ezemplu ba país. “Ita reza atu timoroan hotu tane aas nafatin sakrifísiu no dedikasaun ita-nia eroi sira-nian, ida-ne’e mak ita bele garante hodi fó kontinua nafatin buat ne’ebé sira luta no husik hela”, hateten.
Lembra katak Governu define data 31 Dezembru nu’udar Loron Eroi Nasionál sira-nian hodi dignifika saudozu Nicolau Lobato nia mate iha kombate Mindelo, Same, iha tinan 1978 no foti loron ne’e hanesan marka ba loron eroi nasionál sira-nian mós.
Notísia relevante: Selebra loron nasionál éroi, veteranu – família éroi realiza misa, sunu lilin no kari ai-funan
Jornalista: Nelson de Sousa
Editora: Maria Auxiliadora
