DILI, 24 Dezembru 2025 (TATOLI)—Xefe Deparamentu Maternidade iha Hospitál Nasional Guido Valadares (HNGV), Zinia Mascarinhas, hateten iha fulan-Setembru to’o Novembru 2025 ne’e, bebe neebé mate iha inan nia kabun laran hamutuk 51.
”Kauza husi bebé ne’ebé mak mate iha kabun laran ne’e, tanba inan sira ne’ebé mak ho hipertensaun ho moras diabetes no moras hipertarismu bele mós agrava ba iha bebé nia saúde ho nune’e mak halo bebé mate iha kabun laran,” Zinia Maskarinhas hateten ba jornalista sira iha nia kna’ar ftin HNGV, Bidau, ohin.
Nia esplika, inan sira-ne’ebé mak moras ho komplikasaun sira-ne’e bele mós agrava ba iha bebé mate iha kabun laran.
“Tanba ne’e, husu ba inan sira bainhira isin-rua, ita iha risku laran ita presiza hakbesik an ba iha fasilidade saúde no hakbesik an ba iha pesoál saúde sira, atu nune’e bele hatene ita-boot sira-nia saúde no bele hatene mós ita-boot sira-nia moris no bele hetan atendimentu ne’ebé mak di’ak ba iha inan isin-rua sira,” nia hateten.
Nia haktuir, inan sira partus husi fulan Setembru to’o Novembru tinan 2025 ho totál hamutuk 1.683, no husu númeru ne’e inan sira-ne’ebé ho partu normál hamutuk 1,072, Cesariana 444 no Vacum ka ventoza 106, bebé ne’ebé mak moris ho kaduak hamutuk 37, bebé ne’ebé moris ho pozisaun normál hamutuk 61.
Jornalista : Felicidade Ximenes
Editór : Cancio Ximenes
