DILI, 09 Janeiru 2026 (TATOLI)—Asosiasaun Médiku Timor-Leste (AMTL) fasilita formasaun kuidadu saúde primária temátiku fíziku ba médiku jerál na’in-15 ne’ebé halo servisu iha sentru saúde iha munisípiu Dili.
Prezidente Asosiasaun Médiku Timor-Leste, Herculano Seixas, hateten programa ida-ne’e la’ós foin hahú maibé asosiasaun médiku nian la’o antes ona, ho nune’e agora hahú ho sentru saúde lima (5) iha Munisipiu Dili, Bekora, Formosa, Vera Cruz, Komoro nomos Metinaru.
“Formasaun ida-ne’e sei realiza durante loron rua (2) no formadór sira mai husi Hospitál Nasionál Guido Valadares (HNGV), hodi aprezenta tema oioin ligadu trauma fíziku nian, nune’e oinsá atu halo identifikasaun ba trauma fíziku tuir nia lokalizasaun no halo triajen atu bele kuidadu transferénsia no ospitalár,” Herculano Seixas hateten ba jornalista sira iha sede AMTL, Bidau, ohin.
Nia hatutan, objetivu husi formasaun atu kapasita liután kualidade membru AMTL nian atu nune’e sira bele halo servisu ida-ne’ebé mak di’ak no halo atendimentu ida-ne’ebé mak kualidade ba pasiente sira hodi bele redús mortalidade husi kazu trauma.
Responsável ne’e informa dadus husi Organizasaun Mundiál Saúde hatudu katak Timor-Leste nia mortalidade 7% husi kazu temátiku fíziku hanesan asidente, dezastre naturál, konflitu no seluk tan entaun husi formaasaun ida-ne’e ita bele kapasita sira hodi halo redusaun ba kazu tramátiku,” nia dehan.
Formasaun ida-ne’e sei la to’o iha ne’e maibé sei to’o munisípiu sira hodi fasilita formasaun ba médiku sira hotu.
Formadór, Raimundo dos Santos, hateten husi formasaun ne’e atu fó hanorin ba médiku sira oinsá atu halo aproximasaun ida-ne’ebé estruturadu tuir prinsipiu kuidadu saúde primária ba trauma hotu-hotu.
Jornalista : Felicidade Ximenes
Editór : Cancio Ximenes
