DILI, 06 Marsu 2026 (TATOLI)-Xefe bankada Partidu Libertasaun Populár (PLP), Maria Angelina Sarmento Lopes, apoia polítika reforma husi Komisaun Funsaun Públika (KFP) no Ministériu Finansa (MF) hodi halo reajustamentu ba saláriu kontratu termu sertu iha administrasaun públika hanesan parte ida atu halo poupansa.
Nia apresia ho KFP ne’ebé kompromete ona tinan ne’e atu halo rasionalizasaun ba saláriu kontratadu termu sertu no ida-ne’e di’ak, tanba ho preokupasaun kona-ba presipísiu fiskál, osan Fundu Mina-rai besik hotu bainhira la jere ho di’ak. Tanba ne’e, funsionáriu sira iha direitu hetan saláriu tuir nivel ne’ebé define nune’e bele kontribui ba iha poupansa.
Tuir nia, durante ne’e ministériu no instituisaun públika balun halo rekrutamentu no hatama ema ho kontratu termu sertu no kazuál ne’ebé idaidak define saláriu boot la tuir serbisu ne’ebé hala’o, nune’e nesesita duni atensaun hodi regula halo didi’ak.
“Ba iha setór krítiku sira [funsionáriu] tékniku espesialista, purezemplu, sira iha saúde, ita presiza tebes sira-nia matenek atu ajuda ita-nia ema sira ne’ebé moras, la’ós kontajioza no [tékniku profisionál] sira merese atu valoriza ho saláriu ne’ebé di’ak, Maibé, ho nomeasaun polítika tama husi kór partidária ne’e la presiza”, nia hateten iha Parlamentu Nasionál, ohin.
Deputada ne’e konkorda mós ho tabela salariál, ne’ebé haree mós ba kualifikasaun akadémika no esperiénsia serbisu iha área relevante.
Antes ne’e, deputada husi Partidu Kongresu Nasionál Rekonstrusaun Timorense (CNRT, sigla portugés), Cedelízia Faria dos Santos, apresia ho polítika Governu Dasiak, liuhusi KFP no MF ne’ebé foin ba dahuluk iha Orsamentu Jerál Estadu (OJE) 2026 atu implementa rasionalizasaun saláriu ba funsionáriu kontratu termu sertu iha administrasaun públika.
Lembra katak, KFP hasai ona sirkulár ba liña ministeriál sira atu kumpre dekretu-lei foun númeru 3/2026 kona-ba rejime kontratu termu sertu iha administrasaun públika.
Komisáriu KFP ba Asuntu Planeamentu Forsa Traballu, José Telo Soares Cristovão, hateten dekretu-lei foun ne’e foka ba ajustamentu salariál ba ajente administrasaun públika, kazuál, rejime jerál no asesór sira ne’ebé tama ho kontratu termu sertu.
Lejizlasaun ne’e promulga ona husi Prezidente Repúblika no agora ministériu sira tenke kumpre iha loron 30 nia laran ne’ebé hahú implementa iha fulan-Marsu ne’e, bainhira la kumpre mak parte MF sei kansela pagamentu salariá, tanba iha prosesu ne’e finansa atu halo pagamentu tenke hetan uluk informasaun husi KFP.
Hodi esplika katak halo ajustamentu saláriu tenke bazeia ba esperiénsia serbisu no kualifikasaun akadémika no orienta ba instituisaun sira tenke analiza funsaun atu kontrata ema ida atu mai halo no prodús saida ba instituisaun hodi selu tuir valór saláriu ne’ebé iha.
Iha ministériu lubun mak mai ona KFP hodi halo konsulta ba ajustamentu ne’e no parte KFP nafatin monitoriza atu kumpre implementasaun rejime foun ne’e.
Rejime foun ne’e la aplika ba Institutu Públiku no Empreza Públika sira, nune’e atualmente uza nafatin dekretu-lei númeru 92/2022.
Notísia relevante: https://tatoli.tl/2026/03/01/ministeriu-la-kumpre-rejime-kontratu-termu-sertu-sei-kansela-salariu/
Jornalista: Nelson de Sousa
Editora: Maria Auxiliadora
