VIKEKE, 31 Marsu 2026 (TATOLI)—Sentru Nasionál Chega!, Institutu Públiku (CNC, I.P.), Tersa ne’e, realiza konsulta públika kona-ba prosesu rekonsiliasaun entre timoroan no polítika reparasaun nian ba autoridade no populasaun Munisípiu Vikeke.
Diretór Ezekutivu CNC, Hugo Maria Fernandes, esplika reparasaun ne’e prevee iha Konstituisaun Artigu 11 kona-ba devér Estadu nian atu tau-matan ba vítima funu nian, no dalabarak ko’alia rekonsilasaun ho nasaun Indonézia de’it, maibé presiza rekonsilia mós ho maluk sira-ne’ebé moris hela iha Timor-Leste.
“Ita mós tenke rekonsila ho sira-ne’ebé daudaun ne’e moris hela iha Timor tanba ita-nia funu hahú entre ita,” Hugo hateten iha Salaun Tilou, Vikeke Vila, Tersa ne’e.
Nia espera katak liuhusi konsulta ida-ne’e bele sai bukae di’ak atu hadi’a polítika sira kona-ba reparasaun no rekonsiliasaun.
Iha fatin hanesan, Reprezentante Autoridade Munisípiu Vikeke atuál Sekretériu Asuntu Administrasaun no Finansa Munisípiu Vikeke, Esteão de Carvalho, hateten liuhusi konsulta sira-ne’e povu Vikeke bele rona informasaun sira husi CNC liuliu ba funu naruk ne’ebé povu enfrenta iha tempu ukupasaun nian.
“Estadu iha devér hodi tau-matan ba vítima guerra sira-ne’ebé balun sei moris no balun sei sente tendénsia sira. Liuhusi konsulta ida-ne’e ita hotu bele fó hanoin atu ba futuru bele la’o tuir ita-nia esperansa tanba ita hotu nia hakarak mak ema ida labele moris tan iha kotuk,” nia hato’o.
Partisipa iha konsulta ne’e kompostu husi autoridade lokál, relijiozu, estudante, vítima funu, polísia Munisípiu Vikeke, sosiedade sivíl no komunidade.
Jornalista: Vitorino Lopes da Costa
Editór: Xisto Freitas da Piedade
