KOVALIMA ,01 Abril 2026, (TATOLI) – Vítima Inséndiu iha Aldeia Fatulidun, Suku Dato-rua, Postu Administrativu Fohorem, Munisípiu Kovalima, hetan ona apoiu emerjénsia husi Autoridade Protesaun Sivil liuhusi Servisu Munisipál Jestaun Risku Dezastre Naturál.
“Ami husi Servisu Munisipál Jestaun Risku Dezastre Naturál fó apoiu emerjénsia ba vítima dezastre naturál ho tipu inséndiu bainhira asesu informasaun husi ita nia líder komunitária iha loron 30 Marsu, ohin ami mai fó apoiu emerjénsia”,Diretór Servisu Munisipál Jestaun Risku Dezastre Naturál, João Martins, dehan ba jornalista iha suku Dato rua ,Postu Administrativu Fohorem, ohin.
Apoiu emerjénsia ne’ebé fó mak nesesidade báziku hanesan,mina tein, sanan, tasu, terpal ,foos, manta no ai-han sira seluk.
Kona-ba apoia materiál rekuperasaun ne’e resposabilidade husi Autoridade Protesaun Sivil Nasionál, nune’e autoridade Kovalima submete ona pedidu no relatóriu.
Iha fatin hanesan, Xefe Suku Dato-Rua,Gaudêncio Perreira, esplika katak nia parte mak kontaktu ba APC Kovalima, nune’e autoridade referidu too iha fatin ne’e hodi apoia vítima ne’e.
“Ha’u rasik mak kontaktu relasiona ahi-han ha’u nia komunidade nia uma, ne’ebé sira nia sasan hotu la salva entaun hanesan xefe suku iha responsabilidade atu informa ba autoridade hodi apoia emerjénsia ba sira”, nia dehan.
Vítima Inséndiu Alexandrino Barros konta kronolojia katak, ahi han sira-nia uma iha loron 29 Marsu, iha loron domingo Ramos momentu ne’e sira na’in laiha fatin tanba bá hotu misa iha kapela Dato-Rua.
Vitima inséndiu rasik rona husi viziñu mak fó hatene no bainhira to’o mai labele salva ona sasan uma laran inklui osan balun ahi-han motuk.
Jornalista:Celestina Teles
Editór: Florencio Miranda Ximenes
