VIKEKE, 08 Abríl 2026 (TATOLI) – Motorista transporte públiku munisípiu Vikeke, ohin, husu Governu liuhusi Ministériu Transporte no Telekomunikasaun (MTK), Diresaun Nasionál Transporte no Terestre (DNTT) atu halo intervensaun nesesaria hodi hasa’e tarifa ba transporte públiku diresaun Díli – Vikeke.
Reprezentante motorista, Evaristo Ruas esplika governu presiza hasa’e tarifa atu bele koresponde ba folin kombustível ne’ebé mak kontinua sa’e iha rai laran.
“Ohin ami hasoru ona DNTT iha munisípiu Vikeke hodi aprezenta ami-nia preokupasaun kona-ba problema mundiál ne’ebé akontese hodi rezulta folin kombustível sa’e,” Evaristo ba TATOLI, iha Vikeke Villa, ohin.
Nia dehan kombustível folin sa’e ne’e difikulta tebes ba sira-nia movimentu tanba ne’e, sira husu atu governu halo intervensaun nesesaria.
Evaristo hato’o katak dadaun ne’e folin gasóleu sa’e ona ba $1.65, enkuantu folin gazolina sa’e ba $1.50. Nia subliña katak folin tarifa atuál sei labele rekupera ba gastu ne’ebé iha.
“Presiza halo ajustamenu ba tarifa. Ami sei halo monitorizasaun ba folin kombustível durante semana ida ká rua. Karik presu kontinua sa’e mak movimentasaun transporte públiku Díli – Vikeke sei paradu,” nia dehan.
Maske nune’e, tuir observasaun TATOLI, tarefa transporte públiku diresaun Vikeke – Dili sei nafatin normál.
Responde ba preokupasaun ne’e, Direktór DNTT munisípiu Vikeke, Saul Henrique hateten nia parte anota ona preokupasaun ne’e no sei aprezenta ba nível nasionál.
“Ohin kondutór transporte públiku hotu mai DNTT hodi husu hasa’e tarifa husi $8 ba $10. Maibe, ida ne’e, so nasionál mak bele deside,” Saul esplika.
Nia dehan motorista sira lahetan autorizasaun atu halo mudansa ba tarefa atuál $8. “Karik halo mudansa ruma mak DNTT sei apriende sira nia dokumentu no sira sei hetan multa entre $40 no $60,” nia subliña.
Atualmente, transporte públiku (bis) ne’ebé mak halo movimentu entre diresaun Dili – Vikeke hamutuk 56.
Jornalista: Vitorino Lopes da Costa
Editór: Filomeno Martins
