VIKEKE, 13 Abríl 2026 (TATOLI) – Xefe suku Macadique de Baixo, postu administrativu Uatulari, munisípiu Vikeke, Rogério da Silva, husu Ministériu Agrikultura Peska, Pekuária no Floresta (MAPPF) reabilita irrigasaun Saketu hodi bele distribui bee ba natar.
Xefe Suku Rogério relata katak irrigasaun Saeketu orsa ne’e daudaun aat hela tanba sedimentasaun taka hela kanal distribuisaun be’e ba natar.
“Irrigasaun Saeketu rai taka hela, tanba ne’e fornesementu bee ba natar kuantidade ki’ik lós,” Xefe suku Rogério ba Tatoli,I.P, iha postu Uatulari, ohin.
Nia dehan ho fornesimentu volume bee ne’ebé mak kiik sei difikulta agrikultór sira halai natar.
Autoridade komunitária ne’e hatutan, irrigasaun Saekitu konstroi iha tinan 1992 durante tempu okupasaun Indonézia, maibé Governu seidauk halo reabilitasaun.
“Ami husu ba Governu liuhusi MAPPF tau atensaun ba kondisaun irrigasaun Saeketu. Irrigasaun ne’e presiza reabilitasaun atu ita-nia agrikultór sira bele halo sira-nia natar,” Rogério apela.
Nia dehan maske dauduak ne’e komunidade kontinua halo natar, maibé kondisaun irrigasaun mak aat duni ona hodi prejudika prosesu kultivu hare.
“Povu agrikultór presiza bee, tanba ne’e mak governu presiza aselera reabilitasaun ba irrigasaun ne’e,” nia akresenta.
Hatan ba preokupasaun ne’e, koordenadór estensionista postu administrativu Uatulari, Francisco Tilman Belo, hateten, eskavatór ne’ebé destaka iha Uatulari avaria hela no labele halo operasaun hodi hasai sedimentasaun.
“Atu rezolve problema ne’e, natar na’in sira mak tenke organiza malu hodi hasai sedimentasaun. Se ita hein de’it governu, ida ne’e sei fo impaktu ba natar no produsaun bele menus tanba bee bele maran,” Francisco akresenta.
Tuir dadús, irrigasaun Saeketu fasilita abitante 7.482 husi suku Macadique de Baixo, Macadique de Cima no Makadike Uaitame hodi halo natar ektare 450.
Jornalista: Vitorino Lopes da Costa
Editór: Filomeno Martins
