DILI, 20 Abríl 2026 (TATOLI)—The Franciscan Family of Timor-Leste (FRATILES) konvida sarani katólika sira atu partisipa misa abertura tinan Jubileu São Francisco nian iha 22 Abríl 2026, iha Katedrál Dili.
Misa abertura ne’e sei hala’o iha tuku 16h00, ne’ebé sei prezide husi Arsebispu Metropolitanu Dili no Prezidente Konferénsia Bispu Katóliku Timor-Leste (CET), Don Virgílio Kardeál do Carmo da Silva, SDB.
Konvite ofisiál ne’e hato’o husi Prezidente FRATILES, Frei Mateus Soares Gomes, OFMCap, liuhusi karta, 13 Abril 2026, iha Tibar.
Tinan Jubileu São Francisco nian ne’e deklara ona husi Papa Leão XIV iha 10 Janeiru 2026, aniversáriu ba da-800 São Francisco nia mate iha Assis.
Antes ne’e, Vatikanu deklara ofisialmente tinan espesiál São Francisco nian, ne’ebé hahú ona iha 10 Janeiru 2026, to’o 10 Janeiru 2027, tempu grasa nian ba Igreja Katólika tomak.
Hanesan sita hosi Ajénsia Notisioza Katólika (CAN), Papa Leão XIV konfirma katak tinan espesiál ne’e sei akompaña ho konsesaun induljénsia plenária ba sarani sira-ne’ebé prenxe ezijénsia Igreja nian.
Tinan espesiál São Francisco nian inaugura liuhosi dekretu Penitensiáriu Apostóliku Vatikanu nian, ne’ebé hatuur provizaun pastorál no espirituál ba sarani sira-ne’ebé hakarak partisipa iha selebrasaun sira Jubileu Fransiskanu nian.
To’o 10 Janeiru 2027, sarani sira sei iha oportunidade atu kompleta induljénsia hodi kumpre ezijénsia husi kreda nia kompromisu atu simu Sakramentu Peniténsia, simu Santa Komuñaun no reza ba Amu-Papa nia intensaun sira. Ema fiar-na’in sira hetan enkorajamentu atu halo peregrinasaun ba igreja ne’ebé dedika ba São Francisco de Assis.
Nune’e, Vatikanu iha oportunidade foun ba katuas-ferik sira no ba sira-ne’ebé bele nafatin hetan induljénsia liuhusi partisipasaun espirituál. Tanba liuhusi tinan espesiál ida-ne’e, sarani sira hein atu banati tuir São Francisco, ema-ne’ebé halo dame iha mundu ne’ebé marka ho konflitu no inserteja.
Tuir Orden Frei Menór sira-nian katak momentu ida-ne’e nu’udár oportunidade ida atu konvida sarani sira ba santidade no sai sasin ba dame rohan-laek iha sosiedade.
Jornalista: Osória Marques
Editór: Xisto Freitas da Piedade
