AINARU, 20 Abríl 2026 (TATOLI)—Prezidente Autoriade Munisípiu Ainaru, Manuela Georgina Carmo Bucar Corte Real, informa konstrusaun ba merkadu Maubisse iha ona prosesu aprovizionamentu atu selebra kontratu ho empreza manán-na’in iha fulan-Maiu.
“Merkadu Maubisse iha tinan 2025 ita hato’o proposta hetan ona aprovasaun, entaun ita sei halo konstrusaun. Maibé, tanba prosesu aprovizionamentu ita sei asina kontratu ho empreza ne’ebé manán iha fulan-Maiu,” Manuela hateten bainhira halo palestra ho jornalista sira iha Salaun Sara Postu Administrativu Maubisse, segunda ne’e.
Nia esplika, lei aprovizonamentu mak ko’alia katak, bainhira halo públikasaun ba projetu ida fó tempu ba empreza sira atu konkorre no sé mak manán foin bele ka’er obra referidu.
“Lei mak ko’alia, bainhira halo públikasaun ba projetu ida fó tempu ba empreza sira atu konkorre. Bainhira konkore hotu fó tan sira halo vizita, atu nune’e empreza sira iha interese ne’e bele halo ona kalkulasaun, atu nune’e nia bele hato’o proposta orsamentu. Bainhira vizita hotu, sira mai hatama proposta depois faze avaliasaun depois hotu mak ita halo públikasaun. Públikasaun hotu, ita fó tan tempu ba empreza sira halo reklamasaun. Buat sira-ne’e, ita rezolve loos ona mak avansa ba konstrusaun,” nia dehan.
Nia hatutan, fó tempu ba empreza sira halo reklamasaun atu labele mosu liafuan diskriminasaun entre empreza sira ho na’in ba projetu.
“Ita fó tempu ba empreza sira halo reklamasaun ne’e hanesan ne’e, bainhira iha empreza ida hatama kuota nia orsamentu rihun $180, kiik liu husi ne’e ita fó katak rihun $200, ida ne’e bele mosu ona reklamasaun sira mai husu sira tansa ami-nian ho orsamentu tuun uitoan nusa ami la manán. Sira-ne’eb’e orsamentu boot mak manán, entaun ita esploka, dalaruma ita-boot mai ho orsamentu kiik maibé ami ánaliza labele atu kobre ba obra ne’e. Ami tauk obra ne’e abandona, empreza ida fali osan boot nia manán tanba ami kalkula bele kobre hotu ba projetu ne’e ho kualidade tuir nia osan ne’ebé iha,” nia esplika.
Nia subliña katak, empreza ne’ebé atu manán obra tenke Maubisse oan atu nune’e iha hanoin pozitivu hodi dezenvolve Maubisse.
“Ita hakarak projetu ne’e Maubisse oan mak manán di’ak-liu, atu nune’e iha hanoin atu dezenvolve rasik sira-nia rain. Atu nune’e, obra ne’e hotu Maubisse oan mak utiliza rasik,” nia hateten.
Bainhira projetu ne’e hahú, komunidade besik no utiliza hela merkadu ne’e atu buka fatin seluk balun ho temporária durante tinan ida no obra ne’e finaliza bele utiliza fila-fali.
Jornalista : Hortêncio Sanchez
Editór : Cancio Ximenes
