VIKEKE, 27 Abríl 2026 (TATOLI)—Reprezentante Agrikultór Hae-Oli, Suku Irabin de Baixo, Postu Uatukarbau, Munisípiu Vikeke, Gregório Soares, husu Governu liuhusi Ministériu Agrikultura, Peska, Pekuária no Floresta (MAPPF) konstrui irrigasaun Hae-Oli, Suku Irabin de Baixo ho permanente permanente tanba daudaun semi permanente iha-ne’ebé tempu udan mota estraga beibeik.
“Natar parte Hae-Oli ne’e abandona iha tinan 2014. Iha tinan kotuk (2025) mak MAPPF apoiu ekipamentu pezadu (eskavatór) hodi normaliza irrigasaun ida-ne’e. Kondisaun irrigasaun atuál semi permanente. Tempu udan mota boot sempre sobu irrigasaun. Tan ne’e, ami rekomenda ba ministériu relevante konstrui ami-nia irrigasaun sai permanente,” natar na’in Gregório Soares ba TATOLI iha Postu Uatukarbau, Segunda ne’e.
Nia dehan hakarak produsaun hare sa’e importante irrigasaun di’ak hodi kanaliza bee ba natar. Irrigasaun aat mak sei labele hasa’e produsaun agríkola.
Iha fatin ketak, Xefe Suku Irabin de Baixo, José Baptista do Carmo, rekoñese katak irrigasaun Hae-Oli la’ós permanente, kuandu mota estraga kanál irrigasaun agrikultór sira tenke ke’e fali hafoin kanaliza bee bá natar.
“Irrigasaun ne’e ami aprezenta ona proposta ba postu no postu aprezenta bá Munisípiu Vikeke. Nune’e, ita hein de’it prosesu sira. Irrigasaun ne’e tékniku sira husi Diresaun Planu Dezenvolvimentu Integradu Munisipál (PDIM) Vikeke ba halo ona levantamentu dadus irrigasaun nian hodi tau ba planu períoridade 2027 nian,” nia haktuir.
Nune’e, nia prefere, ba parte relevante tenke konstrui irrigasaun permanente ba natar Hae-Oli hodi fornese bee bá natar sira.
Tuir dadus, natar Hae-Oli ho ektare hamutuk 36 no sei benefísia ba uma-kain 26 iha Suku Irabin de Baixo, Postu Uatukarbau, Munisipiu Vikeke.
Jornalista: Vitorino Lopes da Costa
Editóra: Xisto Freitas da Piedade
