OEKUSI, 28 Abríl 2026 (TATOLI) – Ministru Administrasaun Estatál (MAE), Tomas do Rosário Cabral, tersa ne’e, fó tomada de pose ba Prezidente Autoridade Rejiaun Administrativa Espesiál Oekusi Ambenu (RAEOA) Régio da Cruz Salu, ho estrura ema na’in-24 komposta husi Sekretáriu na’in-tolu no Diretór Rejionál na’in-21 maioria Oekusi-oan.
“Prezidente Autoridade mak reprezenta Governu Sentrál iha ne’e, atu jere ita bo’ot sira, tanba Prezidente ne’e maka jestór la’ós sai fali kunfu, sé Atoni-oan sira la konsege apoia Régio Salu nu’udar Prezidente, imi sé lala’o ba oin, agora laiha ona ema husi Dili mai tan, imi mesak ona, tenki hamutuk,” nia hateten iha diskursu seremómia pose hala’o iha salaun Alfandega Palaban, ohin.
“Hahú ohin ba oin, estrutura RAEOA imi mak kaer, na’in-24, Prezidente Autoridade RAEOA, Sekretáriu Rejionál tolu no Diretór sira, iha tempu badak Ministériu Finansa sei mai halo sidadania, pose ohin ne’e atu fó kompeténsia kbiit ba Oekusi-oan sira atu dezenvolve rai ida-ne’e,” nia apela.
Notísia relevante:Última hora: Ministru Tomas Cabral pose PA RAEOA ho estrutura na’in-24 iha Oekusi
Governante ne’e, afirma, katak Prezidente Autoridade mak reprezenta Governu Sentrál iha Oekusi, tanba ne’e Governu mós sei kontinua akompaña Autoridade RAEOA liuhusi avaliasaun.
“Ami sei mai nafatin, ohin simu pose no deklara katak, sei presta serbisu ba povu nia di’ak, ida-ne’e maki ta rezumu, ita foin hahú hafoin akompaña tinan ida nia laran, halo aváliasaun, sekuandu iha kondisaun aváliasaun, Governu sei fó tan delegasaun kompeténsia balu, parabens ba sira-ne’ebé ohin simu pose, ohin ita hahú loke faze foun ida” nia fó hanoin.
Nia hateten, aktu solene ida-ne’e ba ema n’ain-24, submete ba desizaun Prezidente Autoridade RAEOA, maske mai husi partidu no polítika oioin, maibé povu presiza partisipasaun no povu presiza imi-nia apoia.
Ministru Tomas Cabrál, kompara estrutura RAEOA diferénsia ho munisipíu sira seluk, iha munisipíu balu, sira-nia estrutura ema na’in-20 de’it, RAEOA ema na’in-24, tanba iha komérsiu indústria, apoia jestaun merkadu no seluk tan, rezultadu aváliasaun mak imi-sira-ne’e.
“Ami laiha influénsia, ami entrega ba imi ho populasaun rihun 85-resin mai husi suku 20 no postu administrativu haat, ami husu ita bo’ot tenki unidade serbisu hamutuk ho estrutura foun ida-ne’e, tanba imi rai retan, imi tenki hamutuk atu dezenvolve imi-nia rai,” nia hateten.
Antes ne’e, Governu liuhusi reuniaun Konsellu-Ministrus, aprova projetu Rezolusaun Governu ne’ebé aprezenta hosi Ministru Administrasaun Estatál, Tomás do Rosário Cabral, ba ezonerasaun dirijente servisu iha RAEOA, ne’ebé nomea liuhosi Rezolusaun Governu númeru 37/2025, loron 27 fulan-agostu no nomeasaun ba Prezidente, Sekretáriu no Diretór Rejionál sira RAEOA nian.
Estrutura Autoridade RAEOA ne’ebé simu pose mak hanesan, Régio da Cruz Salu, nu’udar Prezidente Autoridade RAEOA, Sekretáriu Rejionál sira maka hanesan Salvadór da Cruz, ba Administrasaun no Finansas, Francisco Loca, ba Planeamentu no Dezenvolvimentu, no mós Merita Marques Lafo, ba Asuntu Sosiál no Organizasaun Komunitária.
Tuir mai, Diretór Serbisu Rejionál sira hanesan: Domingos Punef simu pose nu’udar Diretór Serbisu Rejionál Administrasaun no Rekursu Umanu, Mario Coel nu’udar Diretór Planeamentu integradu no Dezenvolvimentu, Adelaide Rosália Faria Correia nu’udar Diretóra Serbisu Finansa.
Amâncio Aguido Punef nu’udar Diretór Serbisu Patrimóniu Lojístika, Augusto Jorge de Fátima Efi nu’udar Diretór Serbisu Aprovizionamentu, Anita da Costa Ruing nu’udar Diretóra Serbisu Apoia Organizasaun Naun Governamentál (ONG) no Organizasaun Komunitária, Vicêncio Cono nu’udar Diretór Serbisu Edukasaun, Odete Amado Martins nu’udar Diretora Serbisu Saúde, André Lao nu’udar Diretór Serbisu Seguransa Alimentar, Remígio Nuno Sila nu’udar Diretór Obra Públika.
Yoseph Ili nu’udar Diretór Serbisu Água, Saneamentu Ambiénte, José Oki nu’udar Diretór Serbisu Agrikultura, Anastásia Eni nu’udar Diretóra Gestaun Merkadu Turizmu, Fátima Olga Hei Amaral nu’udar Diretóra Serbisu Asaun Sosiál, José Tanessib Anuno nu’udar Diretór Protesaun Sívil no Jestaun Dezastre Naturál.
Júlio Coel nu’udar Diretór Rejistu Sivíl Notariado, Domingos de Almeida nu’udar Diretór Transporte Komunikasaun, Orlando Quelo nu’udar Diretór Serbisu Komersiu no Indústria, José Ase Neno Colo nu’udar Diretór Terra Propriedade, Cândido dos Reis Amaral nu’udar Diretór Ajénsia Planeamentu no Jaime Taeque nu’udar Diretór Ajénsia Fiskalizasaun.
Jornalista: Abílio Elo Nini
Editór: Rafael Ximenes de A. Belo
