DILI, 29 Abríl 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, hahú halo interrogatóriu judisiál dahuluk ba sidadaun estranjeiru na’in-haat ne’ebé suspeitadu ba kazu droga.
Arguida na’in-rua ho inisiál S, IP, YM, no AF hanesan sidadaun Indonézia.
Arguidu sira to’o iha Tribunál Dili iha tuku 18:00 lorokraik, nune’e Ministeriu Publiku (MP) promove sira ho krime Tráfiku Atividade ilisitu, Konsumu Públiku, Konsumu ilísitu, tuir lei númeru 2/2017 kona-ba kombate tráfiku ilísitu ba droga.
MP promove krime ne’e tanba arguidu sira prejulidu lori no konsumu droga ho tipu Meta Phetamine ka sabu sabu no x-tasi.
Bainhira arguidu sira to’o ba Tribunál Dili, Autoridade Seguransa lori tama arguidu sira ba sala julgamentu no interrogatóriu dahuluk ba arguidu sira prezide husi Juíz Estajiadu Amando Freitas.
Notísia relevante : PNTL detein sidadaun estranjeiru na’in-lima ne’ebé komete kazu droga
Durante interrogatóriu dahuluk ba arguidu sira iha sala julgamentu Juiz Estajiáriu Amando Freitas halo kedas identifikasaun ba arguidu sira.
Hafoin Juíz halo tiha identifikasaun ba arguidu sira, Juíz Estajiáriu Amando Freitas deside adia ba iha loron Kinta (30/04) hodi kontinua rona deklarasaun husi arguidu sira. Nune’e sei kontinua prosede alegasaun husi MP no Defeza arguidu sira nian.
Prosesu interrogatóriu dahuluk ne’e prezide husi Juíz Estajiadu Amando Freitas, MP reprezenta husi Prokuradór Matias Soares, arguidu sira hetan asisténsia legál husi Defensór Públiku, Manuel Amaral, Juvinal Freitas, Anzelmo Pinto Akara, no Advogadu Privadu Adérito Reis.
Jornalista : Natalino Costa
Editora : Julia Chatarina
