BOBONARU, 04 Maiu 2026 (TATOLI) – Empreza Caltech hamutuk ho Eletrisidade Timor-Leste (EDTL, sigla portugés) instala ona torre wind mast iha suku Oe-leu, postu administrativu Bobonaru, munisípiu Bobonaru, atu sukat velosidade anin durante fulan 12.
Xefe Unidade EDTL iha munisípiu Bobonaru, Mário de Jesus Soares, konfirma katak instalasaun torre wind mast ne’e nu’udar parte husi estudu preparatóriu ba dezenvolvimentu projetu enerjia eólika (wind power) iha área referida.
“Estudu ne’e sei halo durante tinan ida atu sukat velosidade anin no nia forsa. Tanba tuir matenek-na’in sira, ita bele prodús 50 megawatts (MW). Agora, parseiru Caltech instala ona torre metru 100. Fulan oin mai ita sei hare tan sasán ne’ebé atu tau iha antena leten hodi sukat anin”, nia informa ba Tatoli, ohin.
Notísia relevante: Rezultadu estudu pra-viabilidade IFC hatudu Lariguto iha poténsia ba enerjia eólika
Mário hateten hafoin konklui estudu, tuir planu, tinan oin paseiru sira sei monta torre enerjia anin iha pontu hamutuk sia, iha suku Oe-leu.
Nia mós husu ba autoridade lokál no komunidade atu asegura no tau-matan ekipamentu ne’ebé instaladu, hodi garante seguransa no kontinuidade rekolla dadus tékniku.
“Sasán ne’e importante la halimar. Ne’e obra boot ida mai ita, ne’ebé esforsu husi Prezidente EDTL, E.P nina iha tinan ida liubá halo negosiasaun ho parseiru atu tulun EDTL iha projetu ida-ne’e. Ne’e atu reforsa tan ita-nia mákina sentrál rua iha Betanu no Hera, ba oin susesu, ita sei la gasta osan barak ba mina”, nia dehan.
Iha sorin seluk, reprezentante komunidade Bobonaru, Bento Lopes, hatudu nia prontidaun atu apoia no tau-matan ba ekipamentu ne’e, no fiar katak projetu ne’e bele implementa iha tinan oin.
“Ida-ne’e ajuda tebes ita. Karik akontese krize kombustivel mundiál no funu iha nasaun boot ruma mak mina laiha moos ita di’ak hela, ahi lakan nafatin, osan mós sirkula de’it iha ita-nia rai-laran”, salienta.
Estudu ne’e realiza ho apoiu finanséiru husi International Finance Corporation (IFC) atu garante disponibilidade dadus tékniku ne’ebé presizu no viavel hodi apoia planeamentu no implementasaun projetu iha futuru.
Projetu konstrusaun no instalasaun enerjia anin (wind power) iha Suku Oe-leu prevee kapasidade estimativa 50 megawatts (MW). Inisiativa ida-ne’e atu redús kustu ba gazóleu, tanba durante ne’e despeza operasionál ladún balansu ho reseita.
Aleinde ne’e, projetu ne’e konsidera nu’udar medida estratéjika atu moderniza infraestrurura nasionál hodi alkansa fornesesimentu enerjia ne’ebé estavel, efisiente ba populasaun.
Notísia relevante: Empreza 𝐂𝐚𝐥𝐭𝐞𝐜𝐡 h𝐚𝐡ú i𝐧𝐬𝐭𝐚𝐥𝐚 𝐓𝐨𝐫𝐫𝐞 ‘𝐖𝐢𝐧𝐝 𝐌𝐚𝐬𝐭’ iha Larigutu-Ossú
Jornalista: Sergio da Cruz
Editora: Maria Auxiliadora
