DILI, 13 Maiu 2026 (TATOLI)-Komisáriu Funsaun Públika, Jorge Paiva Araújo, informa katak funsionáriu públiku na’in-1.985 ne’ebé tama ona reforma iha Janeiru tinan ne’e maioria simu ona direitu pensaun, maibé iha 46 ne’ebé seidauk halo prosesu pagamentu tanba falta dokumentu no la prienxe rekizitu balun.
“Nune’e Komisaun bolu instituisaun sira ne’ebé nia funsionáriu ne’ebé lista sei pendente hela, seidauk simu sira-nia direitu hanesan reforma, liuliu rekursu umanu atu orienta sira-nia funsionáriu mai kompleta dokumentu”, Jorge Paiva hateten.
Komisáriu ne’e esklarese katak husi totál ema 46 ne’ebé seidauk simu pensaun, 33 nia dokumentu seidauk kompletu no 13 seidauk prienxe rekizitu, tanba ne’e Institutu Nasionál Seguransa Sosiál (INSS) labele halo pagamentu.
“Daudaun husu sira atu kompleta dokumentu ne’e para labele lakon sira-nia direitu. La signifika sira ne’ebé reforma ona a partir Janeiru ne’e sira-nia direitu lakon. Bainhira prosesa filafali sira bele simu retroativu”, dehan.
Relasiona ho reformadu na’in-13 mak seidauk prienxe rekizitu tanba sira foin sai funsionáriu ajente tinan rua, tanba lei hateten katak tenke kontribuisaun tinan lima maka, tuir komisáriu KPF tenke kontratu hodi komplenta serbisu tinan lima.
“Ita kontratu ho nia bele serbisu kompleta tinan lima ou nia bele bá serbisu fali iha setór privadu ruma para hetan fali nia kontribuisaun ba fatin seguransa sosiál hodi bele foti nia direitu”, katak.
Notísia relevante: KFP rekoñese númeru forsa traballu iha administrasaun públika laiha balansu
Jornalista: Nelson de Sousa
Editora: Maria Auxiliadora
