DILI, 14 Maiu 2026 (TATOLI)—Prezidente Administrasaun Institutu Seguransa Sosiál (INSS), Zeferino da Costa Bobo, apela ba traballadór sira iha setór públku no setór privadu ne’ebé simu ona Númeru Identifikasaun Seguransa Sosiál (NISS) tenke ba INSS atu hetan password no user nune’e bele asesu ba remunerasaun no kontribuisaun.
Objetivu hosi atribuisaun NISS, nia esplika, atu garante kontribuisaun seguransa sosiál nian, inklui ba funsionáriu privadu sira atubele hetan direitu hanesan pensaun reforma ka sobrevivénsia tanba rejime kontributivu bazeia ba Lei Númeru 12/2016, 14 Novembru, artigu 25, ne’ebé kria rejime kontribuitivu seguransa sosiál nian.
NISS ho karaterístika vitalísia (permanente). NISS iha benefísiu ba empregadu sira bele identifika valór seguransa sosiál nian, ne’ebé ko’a kada fulan 4% husi funsionáriu no 6% husi empreza.
“Kuandu hetan ona kartaun NISS ne’e, idaidak bele mai direta ka liuhosi rekursu umanu kada instituisaun Estadu ka setór privadu nian hodi husu INSS, nune’e bele fasilita user no password. Password no user ita-boot sira sei hetan liuhosi email. Hosi ne’e ita-boot sira bele asesu direta, oinsá asesu ba ita-nia remuneratóriu kontribuisaun kalkulasaun iha mobile App. Tanba ne’e, ha’u husu ba traballadór sira-ne’ebé mak simu ona kartaun NISS mai direta NISS para bele hetan password no user,” nia dehan ba TATOLI iha nia kna’ar fatin, Kaikoli, Dili, Kinta ne’e.
Bobo dehan labele hanoin dehan simu ona ka hetan NISS atu asesu de’it ona remunerasaun no kontribuisaun, lae, maibé presiza hakbesik mai iha INSS.
“Bainhira ita hetan ona karatun NISS ne’e, ita seidauk bele asesu. Presiza hetan lai password no user mak foin bele asesu. Agora oinsá mak atu hetan password no user ne’e kada traballadór tenke iha email privadu no númeru telefone para depoiz INSS envia user no password hodi ita-boot sira bele tama hodi haree ita-nia osan ne’ebé durante ne’e INSS ko’a,” nia esplika.
Prezidente INSS subliña ida-ne’e atu garante no asegura seguransa ba NISS ne’e, tanba mundu modernu no hack mak barak , nune’e INSS hakarak halo ida-ne’e para seguru.
“Se ohin mak ita-boot sira simu ona karatun NISS, ohin kedas tenke asesu ona. Se la konsege asesu ka aban fali mak asesu, ida-ne’e tenke fó filafali password ka user foun hodi ema seluk labele asesu,” nia dehan.
Prezidente Bobo dehan atu haree rejime karreira konstribuisaun iha mobile App ne’e, presiza entidade empregadór ka rekursu umanu tenke fulan-fulan submete tabela salariál, ka bolu naran deklarasaun remunerasaun seguransa sosiál para INSS bele atualiza iha rejime karreira konstribuisaun.
“Se ita hetan ona kartaun NISS maibé ita-nia empregadór ka rekursu umanu mak la deklara ita-nia saláriu mai INSS, ida-ne’e mós ita labele konsege haree ita-nia karreira remuneratória ne’e. Tanba karreira remuneratória kontribuisaun ne’e tenke update fulan-fulan para hatene ema hira mak kontinua servisu no hira mak sai, no karik iha mudansa saláriu,” nia esplika.
Bobo tenik relativamente kartaun NISS ne’ebé to’o agora INSS prodús no atribui hotu ona ba setór privadu no setór públiku sira hamutuk 19.192.
Iha biban ne’e, nia esklarese katak seguransa sosiál la’ós banku, husu labele halo konfunde ba kontribuisaun seguransa sosiál bele foti ka uza ba kréditu.
“Seguransa sosiál ne’e proteje ita ho ita-nia família nia futuru. Tanba kuandu ita hasoru problema ruma ka ita mate, ne’e ita-nia família sira bele asesu pensaun sobrevivénsia. Seluk la mate entaun ba idade reforma. Kuandu reforma mak nia iha INSS hodi rekere para hetan pensaun kada fulan to’o mate,” nia konklui.
Jornalista: Osória Marques
Editór: Xisto Freitas da Piedade
