BOBONARU, 14 Maiu 2026 (TATOLI) – Prezidente Autoridade Munisípiu Bobonaru (PAM), Paulo Moniz Maia, hamutuk ho diretór delegasaun teritoriál, autoridade postu administrativu, autoridade seguransa, líder komunitáriu no populasaun sira, halo lansamentu fatuk-inan ba projetu Programa Nasionál Dezenvolvimentu Suku (PNDS) regulár siklu VII tinan 2026, ho totál projetu 56 no konstrusaun ba sala refeitóriu 19 ba Programa Merenda Eskolár.
Lansamentu ne’e realiza ohin, iha postu administrativu Maliana, ho hahú konstrusaun ba irrigasaun iha aldeia Raimaten no sala refeitóriu iha Eskola Báziku Sentrál (EBC) Maliana. Atividade ida-ne’e marka loron ikus ba lansamentu projetu PNDS ne’ebé hala’o ona iha postu Atabae, BalibÓ, Kailaku, Bobonaru no Lolotoe.
Iha nia intervensaun, PAM Bobonaru husu ba trabalhadór sira, komunidade no tekniku PNDS iha suku atu serbisu hamutuk hodi asegura implementasaun projetu sira la’o ho di’ak, ho kualidade no tuir kalendáriu ne’ebé determina iha kontratu.
Notisia relevante: PAM Bobonaru husu ezekuta obra PNDS 2026 ho kualidade
“Projetu PNDS bele ki’ik, más imi mak sei hetan benifísiu. Orsamentu fó ba sira depois mak hala’o. Atu kualidade ka la’e sira mak halo, ami fó korajen ba sira atu ezekuta projetu ne’e ho kualidade no finaliza tuir tempu ne’ebé asina iha kontratu. PNDS ne’e programa orsamentu anuál, nune’e antes 31 Dezembru projetu tenke hotu, se la’e osan fila ba kofre Estadu”, nia dehan sira hafoin lansamentu iha Raimaten
Administradór Postu Administrativu Maliana, Augusto Caetano, hateten katak lansamentu ne’e sai hanesan pasu importante ida hodi responde ba komunidade nia esperansa no nesesidade.
“Kuaze suku 50 iha Bobonaru hetan benefísiu husi obra PNDS. Iha Maliana, ohin, ita halo lansamentu ba suku hitu, inklui konstrusaun sala refeitóriu no irrigasaun Raimaten. Projetu sira ne’e sei kontinua ajuda hadi’ak moris komunidade no hasa’e produsaun agrikultura” nia dehan
Iha parte seluk, Komandante Polísia Nasional Timor-Leste (PNTL) Munisípiu Bobonaru, Superintendente Carlos Moniz Maia, afirma katak PNTL prontu atu garante seguransa durante implementasaun projetu sira iha suku 50.
“Karik iha impedimentu ruma durante implementasaun konstrusaun, PNTL prontu atu kolabora 24 oras. Bainhira autoridade suku ka PNDS labele rezolve problema rasik, ami prontu ajuda hodi asegura dezenvolvimentu iha ita-nia rai la’o di’ak”, nia afirma.
Xefe Suku Odomau, Cirilio Sírio Bere, konsidera katak obra PNDS sira responde ba komunidade nia nesesidade. “Nesesidade sira ne’ebé komunidade identifika agora bele responde ho fazeadamente. Iha Odomau, implementasaun obra sira maioria la’o ho susesu no remata tuir tempu ne’ebé determina”, nia hateten.
Tinan 2026, Programa PNDS iha Munisípiu Bobonaru kontinua fó prioridade ba setór edukasaun, saúde, bee-moos no infraestrutura seluk. Orsamentu alokadu hamutuk $1.817.330, inklui obra adisionál ho montante rihun $300, no verba hirak ne’e atu ezekuta ba infraestrutura hamutuk 76, inklui orsamentu operasionál.
Notísia relevante: OJE 2026, Autoridade Bobonaru propoin orsamentu hodi finaliza PNDS 2024
Jornalista: Sergio da Cruz
Editora: Maria Auxiliadora
