BOBONARU, 10 Fevereiru 2026 (TATOLI)-Prezidente Autoridade Munisípiu (PAM) Bobonaru, Paulo Moniz Maia, husu ba ekipa teknika no Komité Planeamentu Responsabilidade (KPR) sira atu ezekuta obra Programa Nasionál Dezenvolvimentu Suku (PNDS) tinan 2026 ho responsabilidade, liuliu garante nia kualidade.
“Ita hala’o projetu PNDS iha ita-nia suku tenke responsabiliza ema ne’ebé asina ho xefe suku no aldeia sira atu tau-matan ba projetu ida-ne’e. Koordena serbisu hamutuk ho tékniku no diretór PNDS munisípiu. Se ita la serbisu hamutuk oinsá mak projetu bele la’o? Tékniku sira mós tenke serbisu ho profisionál”, nia hato’o iha atividade sosializasaun sobre Prosedimentu Implementasaun PNDS tinan 2026 nivel munisipál, iha salaun Maria Tapó, ohin.
Antigu deputadu ne’e mós husu atu ezekuta obras tuir kaléndariu implementasaun no bainhira la finaliza tuir tempu determinadu maka sei hetan sansaun.
Notísia relevante: Orsamentu PNDS 2026 iha Bobonaru aloka ba obra 50 no projetu adisionál 18
“Ha’u rona projetu PNDS balun la hotu mós ita hato’o relatóriu ba leten dehan hotu. Ne’e labele akontese tanba ita-nia povu iha baze hatene. Projetu la’ós hotu iha fulan tolu, más to’o tinan mós la hotu. Suku ne’ebé nia projetu to’o Dezembru la hotu, ha’u sei koalia ho diretór PNDS katak tinan rua tuituir malu nia sei la hetan projetu PNDS para ita kumpre, disiplina iha tempu”, nia afirma.
Xefe Suku Soilesu, Marito Pereirra Victor, prontu atu kolabora ho ekipa téknika no implementadora sira, tanba obra PNDS la’ós programa foun.
“Ekipa téknika PNDS mak tenke serbisu maka’as para ita haree uluk mak ninia kualidade, la’ós nia kuantidade, tanba obra ne’e di’ak ba ita hotu, benifísiu ba komunidade”, nia dehan.
Orsamentu PNDS tinan 2026 ba suku Soilesu mak kontinua implementa projetu konstrusaun estrada liga bá fatin turizmu Bee-Tudak Sibi ho distánsia metru 200.
“Ita-nia komunidade sira hili prioridade ne’e tanba maioria ho vida agrikultura, entaun presiza dalan atu lori produtu lokál bá merkadu, no mós atu atrai vizitante lokál no estranjeiru mai fatin Turizmu Bee Sibi”, nia salienta.
Orsamentu PNDS tinan 2026 ba Munisípiu Bobonaru hamutuk $1.817.330 hodi ezekuta ba obra regulár 50 iha kada suku, inklui obra adisionál 18 ho montante verba rihun $300 hodi konstrui refeitóriu ba Programa Merenda Eskolar.
Notísia relevante: OJE 2026, Autoridade Bobonaru propoin orsamentu hodi finaliza PNDS 2024
Jornalista: Sergio da Cruz
Editora: Maria Auxiliadora
