DILI, 14 Maiu 2026 (TATOLI)—Charles Darwin University (CDU), kinta ne’e, atribui Doutoramentu Honoris Causa ba Prezidente Repúblika, José Ramos-Horta, hodi rekoñese ba servisu hotu ne’ebé Laureadu Prémiu Nobel da Páz ne’e halo liuliu atividade promove pás nian.
Ramos-Horta hetan onra ne’e, hafoin Vizita Estadu ida-ne’ebé ho susesu ba Papua-Nova Giné, Prezidente Ramos-Horta to’o iha Darwin, hodi simu akollimentu ofisiál ne’ebé kmanek iha Government House husi Administradór Territóriu Norte nian, David Connolly, no Sue Brosnan OLY.
Reuniaun ne’e marka inísiu ba Prezidente nia vizita ofisiál ba Territóriu Norte, ne’ebé hala’o husi konvite Charles Darwin University (CDU) nian.
Enkontru ne’e serve atu selebra no afirma fila-fali ligasaun amizade ne’ebé duravel, proximidade jeográfika ne’ebé besik, no solidariedade kle’an ne’ebé fahe hamutuk entre povu Timor-Leste no Austrália Norte.
Durante vizita kortezia ne’e, Administradór Connolly ofisialmente hato’o parabéns ba Prezidente Ramos-Horta kona-ba atribuisaun foin lalais Grau Doutór iha Letras (Doctor of Letters – Honoris Causa) husi Charles Darwin University, ne’ebé ajendadu ba loron 14 Maiu. Lider na’in-rua foti oportunidade ne’e hodi refleta kona-ba karáter úniku no espesiál hosi relasaun Timor-Leste ho Territóriu Norte.
“Sira rekoñese katak ligasaun estratéjika ne’e la’ós de’it definidu husi jeografia ne’ebé fahe hamutuk, maibé mós abut kle’an iha ligasaun umana no apoiu istóriku ne’ebé Territóriu Norte fó ona ba povu Timor durante momentu krítiku sira iha sira-nia istória kontemporánea,” Ramos-Horta hateten ba jornalista sira iha aeroportu Internasionál Nicolau Lobato Dili, kinta ne’e.
Hodi hateke ba oin, lider na’in-rua afirma fila-fali sira-nia kompromisu mutuo atu hakle’an liután parseria ne’ebé kle’ur ona ne’e. Diskusaun sira foti importánsia ba hakarak hamutuk atu luan liután kooperasaun bilaterál iha setór krusiál sira hanesan edukasaun, formasaun profisionál, interkámbiu akadémiku, no dezenvolvimentu umanu ne’ebé luan liu.
Prezidente nia vizita, ne’ebé kulmina iha ninia grau onoráriu hodi rekoñese ninia kontribuisaun moris tomak nian ba pas globál, rekonsiliasaun no diplomasia, reprezenta pasu vitál ida hodi hametin ligasaun institusionál no umana ne’ebé sei kontinua hamutuk Timor-Leste no Territóriu Norte ba jerasaun oin mai.
Jornalista : Hortêncio Sanchez
Editór : Cancio Ximenes
