“Amá no apá husik ami”: Istória moruk oan-ki’ak na’in-lima husi Bobonaru

DILI, 13 Maiu 2026 (TATOLI) – Moris no mate hanesan segredu ida ne’ebé ema ida labele hatene. Ema hotu hakarak moris naruk no hamriik hamutuk ho família, maibé dalaruma destinu mai lalais liu hanoin ema nian.

Iha aldeia Kaku, suku Sanirin, postu administrativu Balibó, munisípiu Bobonaru, iha istória triste ida, tanba oan-ki’ak na’in-lima lakon inan-aman iha semana rua nia laran.

Rosalina da Purificação (15), Taufiliana da Purificacão (12), Octaviano Maia da Purificação (10), Aida Maia da Purificação (4), no bebé Aliança da Purificação ne’ebé sei ho fulan tolu, agora tenke moris mesak iha mundu ne’ebé nakukun ba sira.

Sira-nia inan mate hafoin halo operasaun bainhira partu bebé Aliança no hetan moras komplikadu halo nia lakonsege luta ba moris naruk. Semana rua depois, aman mós mate tuir. Triste tanba lakon nia espoza ne’ebé nia hadomi, ikusmai nia deside hakotu nia vida ho hemu aki been. Sira na’in-rua mate iha fulan-Abríl nia laran.

Iha uma ki’ik ida ne’ebé daudaun sei didin ho piku no ai-hun sereja ida iha uma oin, hela istória moruk ne’ebé halo ema hotu triste. Uma ne’ebé antes nakonu ho família, agora muda sai fatin silénsiu no tanis.

Oan sira seidauk komprende saida loos mak akontese ba sira. Sira lori retratu inan-aman nian no tau iha faru metan ida, tanba saudades no domin sira-nia inan-aman. Sira lutu, kesi iha ulun, tau iha kakorok, kesi iha liman no hatais mós roupa metan, nu’udar tradisaun timoroan nian.

Lutu ne’e todan maibé oan-ki’ak na’in-lima ne’e fahe todan ida-ne’e ba malu, liuhusi haforsa malu.

Bainhira jornalista sira to’o atu rona direta sira-nia istória, atmosfera sai triste tebes. Taufiliana da Purificaçao, oan daruak, ho matan-been nakonu, konta momentu ne’ebé muda sira-nia moris tomak.

“Amá mate tiha ami hanoin apá mak sei tau matan ba ami. Maibé apá mós triste tanba amá mate, nia hanoin barak ikus mai mate, husik ami mesak de’it”, Taufiliana dehan ho lian triste.

Nia koko atu tahan tanis, maibé seidauk remata ko’alia nia taka nia oin ho liman rua no tanis. “Apá no ama mate, ami na’in-lima mesak haree malu la di’ak.

Liafuan simples husi oan-ki’ak ida-ne’e halo ema hotu iha fatin ne’e nonook, lubun ne’ebé tuur akompaña ne’e mós tanis, tanba haree ba moris oan ki’ak na’in-lima ne’e moruk duni.  Jornalista sira mós para husu pergunta kuaze minutu rua ka tolu nia-laran tanba laran-moras haree ba situasaun ne’e.

“Amá, apá mate tiha ami mesak haree malu ladi’ak. Atu hola alin nia susubeen laiha entaun ama-boot mak tenke hola, tanba avó ferik ona labele haree ami. Laiha ona ema tau hahán ba ami han molok bá eskola ka sai husi eskola”, nia dehan ho tanis.

Maski sira hasoru moris todan, solidariedade husi ema sira ho laran-di’ak hahú mosu. Vídeo kona-ba kondisaun labarik sira ne’e to’o ba Prezidente Repúblika José Ramos-Horta. Hafoin haree vídeo ne’e, Prezidénsia Repúblika liuhusi Diresaun Sosiedade Sivíl no Asuntu Sosiál haruka ekipa bá haree direta no lori apoiu emerjénsia.

Apoiu ne’e inklui foos, mina, roupa no osan husi kontribuisaun privada Prezidente Repúblika nian atu ajuda nesesidade loroloron labarik sira ne’e. “Ami agradese ba avó Ramos tanba tulun ona ami. Ami husu ba oin avó tulun ami, haree ami-nia han, hemu, saúde no edukasaun”, nia hateten ho lian ne’ebé nakdedar.

Bainhira jornalista husu kona-ba sira-nia mehi ba futuru, oan-ki’ak sira ne’e nonok kle’ur.  Ikusmai Taufiliana hatán ho lian neineik: “Ami hakarak sai susesu, maibé susesu ida ne’ebé loos seidauk hatene tanba ema ne’ebé atu suporta ami husik uluk ami”.

Avó feto Decarlina, ne’ebé agora sai fatin mahon ba nia beioan sira, rekoñese katak nia ferik ona no nia forsa menusa tu sustenta labarik sira. “Ha’u hanoin ha’u mak mate uluk. Maibé agora sira husik hela labarik ki’ik sira ne’e ba ha’u. Ha’u ferik ona, ha’u tinan 65, ha’u forsa laiha ona atu buka osan haree sira”, dehan.

Iha parte seluk, Pascoela dos Santos, bin boot husi inan labarik sira-ne’e, simu responsabilidade atu tau matan ba bebé Aliança to’o boot no hadomi nia hanesan nia oan rasik. Nia dehan difikuldade boot liu nia hasoru mak bebé seidauk hemu susun-been no tanis, maibé hakarak ka lakohi buka susubeen fórmula ba bebé atu hemu.

“Ha’u husu ba avó Prezidente ajuda sira, liuliu ba ki’ik ne’ebé hemu susubeen semana ida hemu kaixa ida”, nia husu ho lian ne’ebé triste.

Asesór Sosiedade Sivíl no Asuntu Sosiál husi Prezidénsia Repúblika, Quintiliano Moniz Carvalho, ne’ebé vizita direta família ne’e sente triste tebes haree kondisaun oan-ki’ak sira.

Ho matan-been nakonu nia hateten katak daudaun sira na’in-lima ne’e seidauk bele sente didi’ak lakon inan-aman ne’e tanba ema sei barak. Maibé bainhira liu fulan lima-neen, sira hela mesak hela mak foin sente didi’ak lakon inan-aman ne’e. Nune’e, nia husu ba família no viziñu atu haree nafatin labarik sira ne’e ho karidade, tanba sira lakon ona inan-aman maibé sira nu’udar futuru nasaun nian.

Iha momentu ida ne’ebé emosionál tebes, Quintiliano haku’ak labarik sira no dehan: “Imi lakon ona imi-nia apá, amá, no agora imi-nia apá no amá mak avó Ramos-Horta”.

Nia hatutan katak iha tempu badak avó Ramos-Horta rasik sei lori sira bá Dili halo tratamentu saúde, liuliu ba bebé ne’ebé sei ki’ik ne’e.

Liafuan ne’e halo labarik sira hamosu oin-midar, hanesan hetan esperansa foun ida iha sira-nia moris.

Xefe aldeia Kaku, Francisco Reis Tavares, hato’o nia agradesimentu ba Prezidente Repúblika tanba bele responde lalais ba situasaun ne’e.

“Hanesan lideransa komunitária ami mós sei halo esforsu foti oan ki’ak sira-nia dadus hato’o ba munisípiu atu futuru bele fó apoiu labarik sira-nia nesesidade”, katak.

Istória triste oan-ki’ak na’in-lima husi Bobonaru ne’e la’ós de’it kona-ba lakon no sofrimentu, maibé kona-ba solidariedade, domin no esperansa ne’ebé sei moris iha ema timoroan nia laran.

Notísia relevante: Oan-ki’ak na’in-lima iha Maliana hetan apoiu husi Prezidénsia Repúblika 

Jornalista: Arminda Fonseca 

Editora: Maria Auxiliadora