DILI, 18 Maiu 2026 (TATOLI) — Sentru Solidariedade Manufahi oan iha Dili no Diaspora (SMD) lansa kampaña solidariedade hodi halibur apoiu ba komunidade afetadu sira iha Kosta Sul, liuliu iha Postu Administrativu Same, Fatuberliu, Alas no Turiskai, Munisipiu Manufahi, ne’ebé daudaun ne’e hasoru dezastre naturál hanesan inundasaun no rai halai.
Kampaña ne’e anúnsiu iha konferénsia imprensa ne’ebé hala’o iha Salaun FONGTIL, Kaikoli, Dili, hosi Vise Koordenadór Jerál Sentru Solidariedade Manufahi oan iha Dili (SMD), Manuel da Costa Mesquita.
Manuel da Costa Mesquita hatete katak dezastre naturál ne’ebé akontese iha área Tasi-Mane la’os de’it hamosu estragu ba uma kain, to’os no infraestrutura báziku, maibé mós hamosu terus boot ba komunidade afetadu sira.
Situasaun triste ne’ebé akontese iha parte Tasi-Mane ne’e bolu ema hotu nia konsiensia sosiál no umanitária atu la bele hateke de’it ho matan, maibé tenke hamriik hodi foti asaun konkreta.
“Ami hato’o apelu nakloke ba ita-boot sira hotu nia laran-luak hodi bele estende liman hodi fo apoiu voluntáriu ho kualker tipu ajuda,” Manuel dehan iha Konferensia Imprensa, Segunda ne’e.
Manufahi oan sira ne’ebé hela no buka moris iha Dili, sira sente terus ne’ebé komunidade afetadu sira hasoru daudaun ne’e. Tan ne’e, sira harii “Sentru Solidariedade Manufahi-oan iha Dili no diaspora” ho tema “Manufahi Hamriik: Solidariedade Tulun Maluk Afetadu Sira iha Kosta Sul”.
Sentru ne’e sei sai pontu prinsipál iha kapitál Dili hodi halibur no jere tulun hosi parseiru, doadór no povu Timor-Leste tomak ne’ebé hakarak estende liman ba komunidade afetadu sira. Sentru ne’e husu apoiu voluntáriu iha forma ai-han hanesan foos, produtu instante, sardina no masin-midar, nune’e mós roupa, kolsaun, sabaun, pasta nehan, pensu ijiéniku ba feto no ai-moruk báziku.
“Iha situasaun ne’ebé susar tebes ba ita-nia maluk afetadu sira iha kosta sul, liuliu iha postu administrativu Alas, Fatuberliu, Same no Turiscai, ami labele nonok hodi hateke de’it ba terus ne’ebé sira simu daudaun. Tan ne’e, liuhosi ‘sentru solidariedade manufahi-oan iha dili’, ami hato’o apelu no nakloke ba ita-boot sira hotu nia laran-luak hodi bele estende liman no fó kontribuisaun urjente,” Manuel esplika.
Kampaña rekolla apoiu ne’e sei hala’o durante fulan ida, hahú hosi loron 18 Maiu to’o 18 Juñu 2026. Komunidade ne’ebé hakarak kontribui bele lori apoiu diretamente ba sentru rekolla iha sede FONGTIL, Kaikoli, Dili, ka kontaktu ekipa koordenasaun.
Dadus provizóriu hosi APC (Autoridade Protesaun Sivil) hatudu katak total uma kain 34 mak afetadu hosi rai halai ka erosaun, no uma kain 106 afetadu hosi inundasaun hosi Same to’o Fatuberliu.
Nia akresenta katak atualmente vitima sira hetan ona apoiu urjente hosi APC no Ministériu Solidaridade Sosiál no Inkluzaun (MSSI), liuliu ba nesesidade báziku. Maibé, sentru solidariedade ne’e kontinua bolu atensaun hosi Manufahi-oan sira no públiku atu fó apoiu tanba nesesidade iha terenhu sei aas nafatin.
“Ami halo kontaktu ativu ho Autoridade Munisipiu Manufahi, APC no MSSI. Dadus sira kontinua atualiza tanba ekipa sira sei hela iha tereñu hodi rekolla informasaun,” hatete nia.
Nia mos subliña katak nesesidade urjente liu daudaun ne’e mak ba inan feton sira, labarik no ema ho defisiénsia, ne’ebé presiza apoiu imediatu hosi komunidade.
Jornalista : Cidalia Fátima
Editora : Armandina Moniz
