OEKUSI, 20 Maiu 2026 (TATOLI) – Prezidente Autoridade Rejiaun Administrativa Espesiál Oekusi Ambenu (RAEOA), Régio da Cruz Salu, apela ba juventude no intelektuál sira, atu promove aan liuhusi oportunidade sira hodi apoia Autoridade hodi dezenvolve Oekusi, ne’ebé koñesidu nu’udar izolamentu ida iha territóriu Timor-Leste.
Autoridade másima Oekusi, informa, perante diskursu ofisiál iha komemorasaun loron Restaurasaun Independénsia 20 Maiu, ne’ebé hala’o iha kampu Um de Maio Palaban Oekusi, ohin.
“RAEOA komprometidu atu hatudu iha área polítika públika, planeamentu no intervensaun sira-ne’ebé promove juventude no oportunidade ba Oekusi. Ita nu’udar rain enklave sempre leva estigma izolamentu, ita sei latoba, sei la nonok, no sei la-la’o lentu hanesan lenuk dolar iha rai-henek tasik-leten,” nia hateten liuhusi diskursu ofisiál.
Aprende no lee barak, hadomi família
Tanba RAEOA iha nia aman ne’ebé lahanesan aman sira bainbain, iha entidade tutelár no superintendénsia maka Primeiru-Ministru, Kay Rala Xanana Gusmão.
“Ita-nia aman ne’ebé hadomi ita la haree ba ita husi Oésilo ka husi Pássabe. Ita-nia aman ida-ne’ebé la kole atu hateke no hakarak rona no hatene bebeik kona-ba ita iha enklave ida-ne’e. Ita di’ak ka la’e, ita bele ka la’e,” nia konsidera.
Tanba ne’e, autoridade ne’e husu ba Juventude sira atu aprende no le’e maka barak, eskola, eskola, buka hatene oinsá bele serbisu ba aan-rasik, ajuda inan-aman no alin-doben sira, hatene no sempre hadomi família.
Tenki reza no tenke hadook aan husi poténsia problema saúde, problema droga, problema krime no problema sira-ne’ebé sei izola de’it ita-boot sira-nia aan.
“Mai ita hotu, ha’u konvida, ita hateke ba oin, ita deside hamutuk, ita lori Oekusi Ambeno ba oportunidade ita hotu nian,” nia enkoraja.
Notísia relevante: Provínsia NTT felisita TL nia aniversáriu Loron Restaurasaun Independénsia 20 Maiu
Nu’udar Prezidente Autoridade RAEOA, husu espesiál atu labele dook husi inan-aman, tenke gasta tempu atu ko’alia ho sira, husu sira atu fahe nafatin memória kona-ba ita-nia istória rai-ne’e no povu doben ida-ne’e, buka hatene no aprende inspirasaun di’ak sira-ne’ebé mai husi ita-nia inan no aman rasik no husi ita-nia éroi sira-nia istória, husi ita-nia lidér boot no ita-nia terus na’in-sira ne’ebé sakrifika sira-nia ruin ho raan atu ita sai nasaun ne’ebé ukun rasik-an.
“Ha’u, Prezidente Autoridade RAEOA, husu mós ba intelektuál sira, liliu lisensiadu no lisensiada sira, atu ida-idak halo deskobrimentu no konsetualiza saida maka ita bele promove Oekusi no halo Oekusi poténsia liután husi ida-idak nia área,” nia apela.
“Ha’u fiar ba ha’u-nia Dirijente sira. Ha’u fiar ba povu no inan-aman sira, ita-boot sira-nian oan sira-ne’ebé agora ajuda ha’u, esforsu atu dezenvolve nafatin ita-nia rain Oekusi, iha períodu governasaun RAEOA ida ohin ne’e, ha’u hamutuk atu sai bebeik no sei de’it maka lidér Oekusi, lidér Timor-Leste sira,” nia énfaze.
“Sira ne’e ita-boot sira-nia oan rasik, sira-ne’e ema husi Pássabe nia oan mós, husi Nítibe mós, husi Oésilo mós, husi Pante Makassar mós. Sira ne’e hanesan mós ha’u, ita hothotu inklui ita-boot sira maka na’in ba ukun rasik-an ida-ne’e, forsa potensiál ba ita-nia rai-doben no liliu ita-nia objetivu no mehi boot dezenvolvimentu RAEOA ne’ebé di’ak-liu.
“Viva 24º Anos Restaurasaun Independênsia Repúblika Demokrátika Timor-Leste,” nia hakotu.
Jornalista: Abílio Elo Nini
Editór: Rafael Ximenes de A. Belo
