DILI, 05 Juñu 2026 (TATOLI)—Primeiru-Ministru, Kay Rala Xanana Gusmão, sesta ne’e, hasoru malu ho Prezidente Repúblika, José Ramos-Horta, hodi informa kona-ba selebrasaun Loron Nasionál Oseanu nian.
Xanana dehan, selebrasaun loron nasionál tasi nian ne’e la’o iha munisípiu hotu-hotu iha territóriu laran. Ba kapitál Dili selebrasaun ne’e akompaña mós ho feira ne’ebé sei hala’o to’o loron Domingu.
”Ha’u mai informa ba Prezidente katak ba selebrasaun ne’e hala’o iha munisípiu hotu-hotu. Iha Dili mós sei to’o Domingu no iha feira ne’e hanesan atu fó lembra,” PM Xanana hateten.
Iha biban ne’e, Primeiru-Ministru mós konvida sidadaun hotu atu vizita feira refere liuliu hodi haree inovasaun husi estudante sira-ne’ebé kria arte husi materiál rezídu.
”Iha tenda eskola KAFÉ nian, labarik sira hatudu sira-nia kriatividades hodi uza plástiku, papel, surat (papelaun) hodi halo arte ka obra resiklajen. Arte sira-ne’e kria ho ideia no vizaun oinsá atu fó protesaun ba oseanu no tasi iha futuru,” nia dehan.
Alende ne’e, Xefe Governu mós relata katak, ba oin, Governu liuhusi Konsellu Ministru sei aplika sistema foun ida hodi kontrola no foti desizaun ba planeamentu orsamentu husi ministériu ida-idak.
”Ha’u mós dehan Konsellu Ministru, ami ko’alia to’o Jullu, ministériu sira tenke komesa ona, ami fó sistema foun ida atu haree didi’ak, ba ida-idak hodi aprezenta nia orsamentu,” nia dehan.
Jornalista : Hortêncio Sanchez
Editór : Cancio Ximenes
