DILI, 08 Juñu 2026 (TATOLI)—Prezidente Repúblika, José Ramos-Horta, antes ne’e ninia ekipa favoritu iha Kopa Mundiál ne’e nasaun Portugál, maibé iha époka ida-ne’e nia apoia hodi hili liu hodi apoiu nasaun kiik ida husi Áfrika naran Kabu-Verde ne’ebé foin dahuluk tama no kompete iha Kopa Mundiál 2026.
“Ha’u apoia mak Kabu-Verde, sira sei manán Kopa Mundiál ne’e, hasai husi Argentina nia liman,” Prezidente Ramos-Horta hateten ba jornalista sira iha Komoro, ohin.
Xefe Estadu ne’e afirma liután, Kabu-Verde ne’e hanesan nasaun kiik loos, ne’ebé dahuluk mak tama iha kualifikasaun Kopa Mundiál iha époka ne’e.
Tanba ne’e, nia sente admira ho nasaun Kabu-Verde nia jogadór sira-ne’ebé halo esforsu to’o tama iha kualifikasaun Kopa Mundiál 2026 ne’e.
“Ha’u admira loos oinsá sira konsege tama Kopa Mundiál, tanba ne’e mak ha’u apoia sira. Ha’u buka Bandeira Kabu-Verde, nein labarik ida faan,” Ramos-Horta dehan.
Nia hateten, Portugál mós nia fó apoiu maibé ne’e nasaun antigu sira ne’ebé ema hotu hatene no la presiza nia fó tan apoiu.
“Kabu-Verde mak ha’u apoiu, reza ba Kabu-Verde mak manán, imi hotu-hotu. H’u hamnasa, Portugál, Brazil sira-ne’e boot,” nia dehan.
Antes konklui, Ramos-Horta ko’alia ho oin hamnasa katak nia sei konvida jogadór famozu Argentina Lionel Messi sei vizita Timor-Leste.
Antes ne’e, Primeiru Ministru, Kay Rala Xanana husu joven sira nafatin kria pás no estabilidade iha jogu Kopa Mundiál.
PM Xanana dehan, kona-ba jogu Kopa Mundiál problema uitoan tanba nia ladun akompaña. Karik mak akompaña mak dehan, tanba ladun akompaña ne’ebé di’ak liu husik ba to’o kuaze atu finál 8 de’it mak iha ne’eba ne’e mak imi husu.
“Iha fatin hotu-hotu, la’ós ba asiste kedas ema tebe bola tebe malu karik la’e,” dehan PM Xanana ba jornalista sira hafoin enkontru semanál ho Prezidente Horta iha Palásiu Prezidensiál Bairu-Pite, Sesta semana kotuk.
Kopa mundiál 2026 ne’e partisipa husi nasaun 48 ne’ebé sei hahú iha loron 12 fulan ne’e to’o lorom 19 fulan oin ne’ebé realiza iha nasaun Estadu Unidu Amérika, Méksiko no Kanadá.
Jornalista : Hortêncio Sanchez
Editór : Cancio Ximenes
