DILI, 10 Juñu 2026 (TATOLI)–Primeiru-Ministru, Kay Rala Xanana Gusmão, apresia ho envolvimentu Reinu Unidu iha The Association of Southeast Asian Nations (ASEAN) ne’ebé ho intensaun atu apoiu ba dame, estabilidade no prosperidade iha rejiaun Sudeste Aziátiku.
Primeiru-Ministru Xanana sente kontente atu hasoru malu ho Subsekretária Estadu Parlamentár Reinu Unidu no Ministra ba Indo-Pasífiku, Seema Malhotra, iha Hanoi, Vietname. Timor-Leste valoriza ninia relasaun ho Reinu Unidu no fiar katak TL bele hametin kooperasaun di’ak liután.
“Ami apresia Reinu Unidu nia involvimentu ho ASEAN no interese hodi apoia dame, estabilidade no prosperidade iha Sudeste Aziátiku,” Primeiru-Ministru Xanana hateten liuhusi nota ne’ebé Agência Tatoli, ohin.
Xefe Governu ne’e konsidera adezaun Timor-Leste bá ASEAN nu’udár realizasaun istóriku ida ba povu timoroan, hodi reflete aspirasaun nasionál ne’ebé iha ona durante tinan barak.
“Entaun nu’udar membru foun ASEAN nian, Timor-Leste komprometidu atu sai parseiru ne’ebé konstrutivu, responsável no ativu. Timor-Leste mós hakarak kontribui bá esforsu ASEAN nian hodi promove pás, diálogu, kooperasaun ekonómika no dezenvolvimentu inkluzivu,” nia hateten.
Xefe Governu mós rekoñese katak partisipasaun efetiva iha ASEAN presiza kapasidade, esperiénsia no parseria forte. Tanba ne’e, Governu Timor-Leste kontinua simu apoiu husi parseiru dezenvolvimentu sira atu fasilita integrasaun liután ba organizasaun rejionál ida-ne’e.
“Iha biban ne’e atualiza mós katak, Timor-Leste daudaun prepara hela ba responsabilidade sira iha futuru iha ASEAN, inklui prezidénsia ASEAN iha tinan 2029,” nia informa.
Nune’e, Primeiru-Ministru simu ho satisfasaun Reinu Unidu nia prontidaun atu apoia Timor-Leste iha dezenvolvimentu ekosistema Artifisiál Intelijénsia (AI) no enkuadramentu governasaun relevante.
“Agradese ba Reinu Unidu tanba komunidade timoroan ne’ebé daudaun hela no servisu iha Reinu Unidu no Irlanda Norte. Prezensa komunidade ne’e sai ponte importante ida hodi hametin relasaun amizade entre nasaun rua, no kontribui mós bá ekonomia Timor-Leste,” nia dehan.
EKIPA TATOLI
