DILI, 11 Juñu 2026 (TATOLI)—Diretór Ezekutivu Konsellu Imprensa (CI, sigla portugés), António Dias, hateten tuir Lei Komunikasaun sosiál nian katak jornalista sira-ne’ebé lahala’o ona kna’ar hanesan jornalista maibé asume fali kna’ar hanesan ofisiál mídia iha instituisaun Estadu normalmente tenke entrega karteira profisionál ba KI
“Signifika bainhira husik hela profisaun jornalizmu no hala’o fali servisu hanesan ofisiál mídia ne’e, ita konsidera inkompatibilidade. Entaun, ita tenke hatene-an voluntariamente lori kartaun profisionál mai iha CI hodi suspende temporária ita-nia misaun hanesan jornalista,” Diretór ne’e informa ba jornalista sira iha edifísiu Konsellu IMprensa, Kintal boot, ohin.
Nia dehan, CI halo hela servisu ida-ne’e no monitoriza hela tanba iha benefisiáriu balun mak voluntariamente lori sira-nia kartaun profisionál mai submete iha CI, iha biban ne’e atu informa mós katak kartaun ne’e iha ninia loron invalidu (espiradu) to’o de’it tinan rua.
“Tanba ne’e husu mós ba asosiasaun sira atu haree asuntu ida-ne’e tanba asosiasaun hamriik atu tane aas profisaun jornalista. Ne’eduni bainhira jornalista ne’ebé komete ona inkompatibilidade sira bele informa hela ba benefisiáriu sira,” nia dehan.
Asesória mídia nia mandatue ramata, CI nafatin atribui karteira posfisionál
Nia dehan,, loos duni pesoál asesória imprensa sira-ne’ebé servisu iha instituisaun públiku no privadu ruma ne’e barak liu nomeasaun polítika, maibé bainhira sira-nia mandatu hotu ona no sira hakarak kontinua hala’o profisaun hanesan jornalista, entaun CI nafatin atribui karteira profisionál ba sira tanba lei fó dalan.
Timor-Leste nia Lei Komunikasaun Sosiál (Lei Nú. 5/2014) Artigu 17 ko’alia kona-ba Inkompatibilidade be’e, bandu profisionál sira atu hala’o servisu jornalístiku iha tempu hanesan ho funsaun sira-ne’ebé konsideradu prejudika ba independénsia no imparsiál.
Aktividade Inkompatível (Labele hala’o hamutuk):
- Serbi nu’udar Funsionáriu Públiku.
- Kaer kargu ruma iha órgaun soberania, podér lokál ka lideransa komunitária.
- Dirije partidu polítiku. Serbi hanesan relasaun públika (PR), asesór imprensa, komunikasaun ka imajen.
- Hala’o kualkér atividade atu promove bens e servisu (hanesan publisidade).
Obrigatoriedade:
Jornalista ida-ne’ebé simu ka hala’o funsaun sira iha leten tenke entrega fila-fali nia karteira profisionál ba Konsellu Imprensa Timor-Leste no labele hala’o atividade jornalístiku.
Enkuantu, dadus husi tinan 2017 to’o 2026, CI atribui ona karteira profisionál ba jornalista hamutuk-459. Benefisiáriu sira-ne’ebe entrega ona karteira profisionál tanba ba servisu hanesan ofisiál mídia iha Governu hamutuk-178 no daudaun ne’e ba jornalista ativu hamutuk-281.
Jornalista : Alexandra da Costa
Editór : Cancio Ximenes
