Kovalima, 11 Juñu 2026 (TATOLI) – Komandante Polísia Nasionál Timor-Leste (PNTL), Munisípiu Kovalima, Superintendente Xefe, Paulino Carmo Ferreira, alerta ba joven-sira atu hakribi violénsia, nune’e foku atu estuda nune’e hodi halo dezenvolvimentu iha Timor-Leste (TL).
“Agora, la’os ona tempu atu baku malu, tempu oinsá balun atu ba eskola, balun servisu iha suku hodi ajuda xefe suku hodi halo dezenvolvimentu bainhira baku ema sei la fó osan , di’ak liu lalika halo tanba bainhira ba prizaun ita sei la livre”, Komandante PNTL, Munisípiu Kovalima, Superintendente, Xefe Paulino Carmo Ferreira alerta iha Suku Beco.
Komandante PNTL ne’e dehan, lalika hanoin atu kria problema tanba iha tempu pasadu eroi sira fó aan ba mate atu hetan ukun rasik aan , agora tempu atu halo dezenvolvimentu nune’e presiza atu kontribui ba seguransa hodi kria pás no estabilidade
Razaun presiza kria pás no estabilidade, nune’e hodi fó biban ba investedór husi nasaun estranjeiru sira halo investimentu iha Timor-Leste ho livre laiha impedementu bainhira estabilidade ladi’ak ema labele halo investimentu
“Ita nia Nasaun ne’e presiza hakmatek la’os ona tempu grupu sira atu sadik malu, maibé tempu ema hotu foku atu halo dezenvolvimentu oinsá ita nia kontribuisaun atu ba iha dezenvolvimentu “nia dehan.
Atu hala’o dezenvolvimentu ho di’ak ba dahuluk presiza kria establidade hakmatek ne’ebé mai husi unidade hahú kedas husi família mai to’o bairru aldeia no suku to’o iha nivel munisipál.
Ho nune’e, nia dehan bainhira laiha estabilidade, oinsa iha unidade bainhira nafatin kria konflitu labele hala’o dezenvolvimentu atu hala’o dezenvolvimentu presiza kria pás no estabilidade.
PNTL nia servisu natureza hanesan polísia Komunitária hodi halo nia prosimidade iha komunidade, tanba ne’e mak esbalese ona KPK iha suku sira, nune’e koloka Polísia Suku (PS) sai hanesan liña ba dahuluk ba seguransa iha baze bainhira mosu problema karik sira mak sei informa ba nivél komandu.
Tuir dadus PNTL munisípiu Kovalima liuhusi Seksaun Investigasaun Kriminál rejista kazu hahú janeiru to’o Abril, ne’e hamutuk 50 husi númeru ne’e kazu violénsia domestika mak aas hamutuk 17, tuir mai mak kazu agresaun fiziku ka asaltu hamutuk 16, kazu sira seluk hanesan danu, omesídiu 1 ka rua no kazu sira seluk ho númeru ne’ebé ki’ik.
Jornalista: Celestina Teles
Editor: Florencio Miranda Ximenes
