DILI, 12 Juñu 2026 (TATOLI)-Primeiru-Ministru, Xanana Gusmão, relata ba Prezidente Repúblika (PR), José Ramos-Horta kona-ba nia viajen bá Rúsia no Portugál iha semana oin.
“Ha’u informa ba Prezidente Repúblika, segunda feira (15/06) ha’u sei bá Rúsia. Bá ho Simeira ASEAN Rúsia nian. Uluk ha’u bá Japaun ho ASEAN no Austrália ne’e ita seidauk sai membru ASEAN, maibé agora ne’e ita sai membru ona ha’u tenke bá”, Xanana Gusmão informa iha Palásiu Prezidénsial Bairu Pité, Dili, ohin.
Tuir nia, depoizde partisipa simeira iha Rúsia nia sei kontinua viajen bá Portugál hodi partisipa konferénsia ida iha ne’ebá, no sei hasoru malu mós ho estudante timoroan sira ne’ebé estuda hela direitu iha Portugál.
“Ha’u sei hasoru sira, tanba ita presiza duni hadi’a sistema ne’e. La’ós agora maibé médiu prazu ita tenke hadi’a, tanba ita-nia problema boot mak lian portugés. Entaun, ha’u sei hasoru malu ho sira, no hasoru malu mós ho Prokuradór-Jerál ho tan Prezidente Supremu Tribunál. Ida-ne’e atu fó hatene katak, sira atu mai ne’e atu ajuda, la’ós mai atu halo akórdaun boboot, ita-nia juis sira lee ba la komprende buat ida no asina de’it”, nia dehan.
Aleinde ne’e, Xefe Governu mós informa ba Prezidente Repúblika kona-ba Governu realiza ona reuniaun kona-ba Jornada Orsamentál 2027.
Jornalista: Arminda Fonseca
Editora: Maria Auxiliadora
