DÍLI, 14 Juñu 2026 (TATOLI) – Iha Timor-Leste, nasaun ida ne’ebé hakat liu ona esperiénsia konflitu iha pasadu, no esforsu atu promove kultura dame no respeitu malu entre foinsa’e sira kontinua sai prioridade iha setór edukasaun.
Ba Ensinu Sekundáriu Jerál Fitun Naroman Timor Lorosa’e (FINANTIL), “edukasaun karákter” konsiderada nu’udar dalan di’ak liu no efetivu atu prevene no rezolve konflitu entre estudante sira.
Adjuntu Diretór Ensinu Sekundáriu Jerál FINANTIL, Sabino Ernesto, hateten katak edukasaun karákter mak prosesu kontinuasaun ida atu forma personalidade, hametin valor moral, no kompeténsia sosioemosional estudante sira nian.
Tuir nia, liuhosi edukasaun karákter, mestre sira ajuda estudante sira dezenvolve responsabilidade morál, respeitu ba malu, disiplina, no kapasidade intelektuál atu halo desizaun ne’ebé loos. Prosesu ida-ne’e promove komportamentu ne’ebé saudável, tolerante no livre husi violénsia.
Sabino dehan konflitu entre estudante sira iha FINANTIL la’ós buat foun. Maibé nia dehan liuhosi edukasaun karákter, estudante sira komesa hatene importánsia dame, respeita-malu no kooperasaun. “Ida-ne’e mak sai xave atu muda sira nia atitude no komportamentu,” nia salienta.
Diretór ne’e esplika katak mudansa pozitivu ida-ne’e komesa hatudu klaru iha eskola FINANTIL durante tinan rua ikus ne’e.
Nia dehan se hateke fali ba kotuk, estudante FINANTIL no Ensinu Sekundáriu Jerál 10 de Dezembru dala barak envolve-an iha konflitu, maibe “agora situasaun ne’e muda ona ba di’ak.”
“Iha tinan hirak liubá, estudante FINANTIL no estudante Ensinu Sekundáriu Jerál 10 de Dezembru dala sempre halo konflitu. Maibé hahu husi tinan 2024 to’o agora, sira komesa hakribi violénsia no prioriza estuda hodi kontribui ba dame no estabilidade,” nia salienta.
Sabino atribui mudansa pozitiva ne’e ba esforsu mestre sira nian ne’ebé intensifika sosializasaun no implementasaun edukasaun karákter iha atividade aprendizajen loroloron.
Nia reitera: “Edukasaun karáter ajuda hametin personalidade, morál no étika – ho nune’e, estudante sira bele aprende atu respeita malu, aseita diferensa, sai sidadaun responsável, onestidade, disiplina, tolerante, no solidariedade.”
Aleinde ne’e, FINANTIL halo aproximasaun ho estudante no mestre sira husi Ensinu Sekundáriu Jerál 10 de Dezembru hodi promove amizade no kooperasaun.
“Husi edukasaun karákter no aproximasaun entre komunidade eskola rua ne’e, estudante sira agora la iha ona sentimentu ódiu no vingansa ba malu. Sira fó prioridade ba amizade no foku liu ba prosesu aprendizajen,” Sabino konklui.
Jornalista: Camílio de Sousa
Editór: Filomeno Martins
