OEKUSI, 15 Juñu 2026 (TATOLI) – Komunidade uma-kain 16 ne’ebé iha bairru Sikone suku Costa sub-rejiaun Rejiaun Administrativa Espesiál Oekusi Ambeno (RAEOA), dezde ukun an to’o ohin loron seidauk asesu kanalizasaun bee-moos no liña eletrika.
Tanba ne’e, sira rekomenda ba Governu liliu Autoridade RAEOA bele konsidera, razaun antes ne’e Governu halo ona reabilitasaun ba sira-nia estrada atu asesu ba vila liuhusi bairru Oétulu maibé kalan sei nakukun no kuru bee-moos tenke la’o do’ok kuaze kilometru-rua mak foin bele kuru bee iha bee-matan.
“Ami hela iha ne’e dezde 1999. Dezde ita ukun aan to’o agora ami sei nakukun hela, ami agradese tanba foin daudaun ne’e projetu emerjénsia Governu konsege hadi’a ona ami-nia dalan atu asesu ba vila, maibé ami triste nafatin tanba estrada di’ak ona, maibé ami sei nakukun hela, depois bee-moos ami tenke la’o kilometru rua mak foin kuru iha bee-matan, dadersan oan-sira kuandu ba eskola, tenke ba kuru dook hodi haris mak foin ba eskola, ” Komunidade bairru Sikone, José Sabo hateten ba jornalista sira iha bairru Sikone, ohin.
Komunidade ne’e rekorda katak preokupasaun ne’e antes ne’e sira hato’o ona ba autoridade lokál sira atu levanta ba Autoridade RAEOA, maibé seidauk responde.
“Ami prontu serbisu voluntária importante fó ami poste ho fiu no apoia kanaliza ami-nia bee-moos husi bee-matan mai to’o ami-nia bairru. Ami mampu (bele) hola pulsa elétrika importante apoia ami, tanba durante ami iha opsaun rua; balu ba kuru iha bee-matan no balun ba kuru iha markas F-FDTL ne’ebé hela iha foho Sikone maibé la’o do’ok kuaze hanesan kilometru ida-resin,” nia haktuir.
Iha fatin hanesan Hironimo Cipa, reforsa-tan katak, komunidade uma-kain 16 hela iha bairru Sikone, barak mak haki’ak animál hanesan karau bibi no kuda, entaun presiza mós.
“Ami hahán iha, maibé ami-nia susar maka bee-moos loron-loron tenke ba kuru, ami rekoñese hela do’ok no fatin izoladu, maibé fatin maka serbi atu haki’ak ami animál, tanba ha’u hanesan haki’ak atu kompete iha eventu sira, balun karau, planu atu kuda modo maibé bee mak laiha. Agora ba ahi, durante ne’e, ami uza sunu de’it ahi-oan tau mina rai,” nia hateten.
Notísia relevante:Empreza Sales Luís hahú reabilita estrada husi bairru Sikone bá Oetulu
Hatan ba kestaun ne’e, Diretór Serbisu Rejionál Água Saneamentu no Ambiente (SAS) Oekusi, José Ili, rekoñese katak parte tékniku halo ona dezeñu no kalkulasaun kustu (Bill of Quantities – BoQ) ba bee-matan ida-ne’ebé identifika ona iha tinan kotuk. Maibé, ezekusaun serbisu ne’e labele la’o tanba mudansa estrutura iha RAEOA.
“Tinan kotuk ami identifika ona bee-matan ida, maibé depois ami halo ona dezeñu no BoQ, maibé tanba tempu no mudansa estrutura RAEOA maka afeta buat sira-ne’e, ne’ebé ita konsidera sei tama iha planu prioridade tinan oin atu bele halo kanalizasaun, tanba bairru Sikone klaru seidauk iha projetu bee-moos ida, tantu Governu no parseriu dezenvolvimentu,” nia hateten.
Entretantu, Jornalista Ajénsia, I.P tenta konfirma asuntu ne’e ho Xefe Operasaun EDTL Oekusi, Antão Cabal, maibé laiha fatin tanba hala’o hela serbisu iha terrenu.
Jornalista: Abílio Elo Nini
Editór: Rafael Ximenes de A. Belo
