OEKUSI, 24 Marsu 2025 (TATOLI) – Empreza Sales Luis, Unipesoál Lda, hamutuk ho Diresaun Rejionál Infraestrutura (DRI), hahú halo reabilitasaun ba estrada kilometru hitu husi bairru Sikone, suku Lalisuk liga bá bairru Oétulu, suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Xefe Departementu Ponte Estrada no Kontrolu Seia husi Diresaun Rejionál Infraestrutura (DRI)-RAEOA, Cornelio Seran, husu ba kompañia atu kumpre Bill of Quntity (BoQ) hodi garante kualidade projetu estrada ne’e.
Notísia relevante:KAFI Oekusi aprova projetu emerjénsia 26 ho kustu millaun $36-resin
“Estrada ne’e nia medida metru-sia, tan ne’e ita rekomenda ba kompañia atu aterru tuir BoQ, katak rai nia aas atu aterru ne’e iha sentimetru-20, maibé antes seidauk sama, rai nia aas iha sentimetru-30, nune’e estrada ne’e bele to’os no kualidade tanba estrada kilometru hitu ne’e sei nahe hotu ho simentu, bazea dezeñu BoQ nian” nia dehan iha bairru Sikone, ohin.
Nia informa, reabilitasaun ne’e la’os estrada de’it, maibé sei kompleta ho drainajén no ponte, nune’e reabilita estrada rurál liga suku Lalisuk no Costa.
Iha fatin hanesan, Diretór Empreza Sales Luís, Unipesoál Lda, Steven Sales Luís, promete iha fulan dahuluk sei konsentra atu hamoos no ke’e hodi haluan mak foin bele aterru.
“Tanba projetu ne’e emerjénsia entaun iha fulan dahuluk ne’e ami sei hamoos de’it, no ekavatór sira sei ke’e no loke dalan halo luan tanba tuir dezeñu ne’ebé prepara ona ne’e husi metru hitu to’o metru sia”, nia promete.
Entretantu, Xefe Suku Lifau, Hermenegildo Lalisuk, agradese no espera durante implementasaun projetu referida presiza konsidera rai komunidade no plantasaun sira-ne’ebé kuda iha komunidade sira-nia toos.
“Ha’u agradese tanba povu hein hela durante tinan 25 ba estrada ne’e, dezde tempu portugés, to’o agora labele asesu ho transporte tanba subida maka’as. Nune’e husu komunidade atu labele impede,”nia sujere.
Entretantu, kona-ba valór kontratu Autoridade RAEOA seidauktanba hein selebra kontratu ho kompañia tanba presiza kumpre hela orden servisu hodi hein desizaun finál husi Ajénsia Dezenvolvimentu Nasionál (ADN).
Notísia relevante:Dalan alternativa husi suku Bobokase liga bá Kutete kotu
Jornalista: Abílio Elo Nini
Editór: Florencio Miranda Ximenes
