OEKUSI, 25 Fevereiru 2025 (TATOLI) – Xefe suku Bobokase, iha sub-rejiaun Pante Makasar, Tomas Nese, hateten estrada rurál iha bairru Sikone, suku Bobokase liga bá suku Kutete kotu, dezde Janeiru to’o agora seidauk hadi’a, hodi difikulta komunidade sira atu transporta produtu lokál ba merkadu.
Tanba ne’e, autoridade komunitária ne’e rekomenda ba Diresaun Rejionál Infraestrutura Oekusi hodi halo normalizasaun urjente.
Notísia relevante:Estrada kotu, difikulta komunidade Kutete lori produtu lokál ba merkadu
“Antes ne’e, ha’u komunika obra públika karik bele mai halo normalizasaun ba dalan alternativa atu fasilita komunidade husi suku tolu ne’e hanesan Nípani, Kutete no suku Bobokase hodi bele halo movimentasaun bá merkadu. Ami husu atu loke dalan foun tanba estrada ne’e kotu bebeik ona bainhira iha tempu udan,” dehan autoridade lokál ne’e.
Kuaze fulan-rua ona husi Janeiru 2025, komunidade sira husi Kutete la’o hodi leba de’it sira-nia sasán, hanesan produtu lokál no sasán kioske nian mai to’o bairru Sikone mak hein karreta hodi atu lori ba merkadu.
“Ami-nia hanoin di’akliu loke fali dalan foun, tanba tinan-tinan akontese rai halai, ita haree iha kra’ik ne’e, rai nia kualidade mak la di’ak, ne’ebé ha’u espera obra públika bele mai halo levantamentu atu loke husi ne’ebé tanba rai uitoan ne’e ladi’ak to’o tempu udan sempre halai,” nia rekomenda.
Diresaun Rejionál Infraestrutura planu halo normalizasaun
Hataan ba rekomendasaun ne’e, Diretór Diresaun Rejionál Infraestrutura, Remigío Nunu Sila, promete sei hala’o normalizasaun maibé iha tempu bailoron tanba daudaun udan hela, nune’e difikulta atu halo normalizasaun.
“Ha’u hetan ona kontaktu husi ita-nia komunidade sira no Sekretáriu Rejionál Administrasaun, tanba antes ne’e sira lori materiál ba eleisaun suku iha Kutete difikulta tebes, liuliu karreta labele ultrapasa tanba dalan kotuk entaun ita orienta kedas IGAEDI to’o kedas iha fatin,” nia hateten.
Maibé nia dehan, hafoin ekipa husi IGEADI observa seidauk bele rezolve tanba risku bo’otliu rai halai, entaun seidauk bele hadi’a.
“Sei hadi’a agora orsida sei akontese tan rai monu nafatin entaun solusaun mak ne’e iha sei deskute ho komunidade sira hodi bele loke fali estrada foun,” nia promete
Rekorda fali katak, iha 2023 estrada rurál ne’e hetan reabilitasaun husi empreza lokál Lifau Indah Unip,Lda, ho valór kontratu $2,623,959.80, orsamentu ne’e Autoridade prevee husi Orsamentu Jerál Estadu (OJE) 2022.
Distánsia ba reabilitasaun estrada rurál ne’e, hahú husi suku Bobokase liga ba bairru Kutete, aldeia Mahata, suku Costa ho distánsia kilómetru 14, estrada ne’e nia medida metru-lima, kompleta ho valeta, ponte boot ida no ponte ki’ik hamutuk 10 no morru kontensaun.
Notísia relevante:PM inaugura projetu reabilitasaun estrada kilómetru 14 iha Pante Makasar
Progresu reabilitasaun estrada rurál hosi Bobokase – Kutete atinje 70%
Jornalista: Abílio Elo Nini
Editór: Florencio Miranda Ximenes
