OÉ-CUSSE, 27 novembru 2022 (TATOLI)—Primeiru-Ministru (PM), Taur Matan Ruak, domingu ne’e, inaugura projetu reabilitasaun estrada rurál iha aldeia Fatubijae, suku Bobokase, ne’ebé liga bá bairru Kutete, aldeia Kutete suku Costa, sub-rejiaun Pante Makasar, ho naruk kilómetru 14, iha Rejiaun Administrativa Espesiál Oé-cusse Ambeno (RAEOA).
“Ha’u kontente loos ho relatóriu ne’ebé ohin Prezidente Autoridade RAEOA relata sai. Durante ne’e tau-matan ba bee-moos, eskola, postu saúde, ponte no estrada, ida-ne’e ajuda maka’s inan-aman sira atu mellora ita-boot sira-nia vida loron ba loron,” PM Taur hateten iha serimónia inaugurasaun projetu reabilitasaun estrada rurál, iha suku Bobokase, Oé-cusse.
Serimónia ne’e akompaña mós hosi Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, Ministru Justisa, Tiago Sarmento, inklui Deputadu balun.
Projetu ne’e ho durasaun serbisu fulan-24, hahú inísiu tinan 2023 to’o tinan 2024 nia rohan.
Xefe Governu relembra, bainhira haree fali iha tempu pasadu to’o oras ne’e, Oé-cusse iha ona mudansa boot ba dezenvolvimentu, ne’ebé mudansa sira-ne’e akontese la’ós tanba milagre maibé tanba Oé-cusse oan sira bele serbisu hamutuk.
Nune’e, nia felisita Autoridade RAEOA tanba iha polítika integradu forte atu dezenvolve rejiaun espesiál ne’e hodi hasai povo hosi izolamentu.
“Ohin ha’u kontente loos tanba imi-nia rezultadu serbisu di’ak no lori benefísiu ba imi-nia komunidade no família iha Oé-cusse atubele asesu estrada hodi hala’o atividade moris loron-loron,” PM Taur louva.
Gasta ona millaun $6 resin ba infraestrutura
Iha biban hanesan, Prezidente Autoridade RAEOA, Arsénio Paixão Bano, relata, desde tinan 2021 to’o 2022, RAEOA gasta ona Orsamentu Jerál Estadu (OJE) ba infraestrutura estrada rurál, ponte no kontrolu seias ka gabiaun hamutuk millaun $6 resin.
“Orsamentu ne’e envolve projetu hamutuk 13, inklui projetu reabilitasaun estrada rurál ne’e. Projetu ida mak hosi sub-rejiaun Nítibe liga bá sub-rejiaun Pássabe, tanba desde tempu portugés, sub-rejiaun rua ne’e ladún asesu ba estrada, no projetu daruak mak estrada ida-ne’e hosi suku Bobokase liga bá fatin izoladu Kutete suku Bobokase,” nia informa.
Notísia relevante: RAEOA aloka millaun $4-resin ba projetu manutensaun-reabilitasaun estrada rurál
Projetu 13 ne’e to’o oras ne’e inklui projetu ponte altervativa rua hanesan ponte Bitopa no Noetoko atu fasilita pasajen komunidade hosi sub-rejiaun Oésilo, Pássabe no Nítibe asesu bá sub-rejiaun Pante Makasar.
Aleinde ne’e, reabilitasaun estrada seluk iha suku Naimeko, sub-rejiaun Pante Makasar, iha Leolbatan fronteira, inklui mós projetu eskola sira atu asesu estrada bá eskola iha tempu udan.
“Ohin ita inaugura projetu reabilitasaun estrada ne’e, ha’u hanoin sei fó tulun ba komunidade atu asesu bá merkadu, tanba projetu barak liu ne’ebé halo iha suku ne’e rasik, hahú hosi eletrisidade mós kuaze populasaun 99% asesu ona inklui bee-moos, ne’ebé projetu barak liu maibé balun la halo inaugurasaun. Tékniku hosi obra públika halo fiskalizasaun hafoin entrega direita ba autoridade, no komunidade uza daudaun, entaun tinan ne’e ramata ita sei konklui projetu 13 kompostu hosi estrada, gabiaun no ponte balun,” nia tenik.
Notísia relevante: Reabilitasaun estrada rurál ho kilómteru 14 benefísia komunidade Bobokase-Costa
Nune’e mós, Abitante suku Bobokase, Tomas Nesi, orgullu tanba autoridade konstrui obra ne’e ba komunidade lokál no fatin izoladu Kutete hodi fasilita transporte públiku no privadu asesu ba merkadu iha tempu bailoron no udan.
“Agradese ba autoridade tanba tinan ne’e bele hadi’a ona estrada, tanba komunidade barak mak hela iha foho Kutete bainhira tempu udan susar tebes atu ultrapasa, maibé tinan ne’e autoridade hahú hadi’a ona, entaun iha futuru ami sei laiha problema estrada,” nia dehan.
Projetu reabilitasaun estrada rurál ne’e ezekuta hosi empreza lokál, Lifau Indah Unip,Lda, ho valór kontratu $2.623.959,80, ne’ebé prevee ona iha Orsamentu Jerál Estadu (OJE) 2021 nian.
Manutensaun estrada ho naruk metru 5, kompleta ho valeta, ponte boot ida no ponte kiik hamutuk 10 inklui morru kontensaun.
Abitante iha aldeia mahata hamutuk 1.899, kompostu hosi mane 908 no feto 991, no abitante iha aldeia Fatubijae no Bihala iha suku Bobkokase hamutuk 3.105, kompostu hosi mane 1.592 no feto 1.513.
Jornalista : Abílio Elo Nini
Editora : Julia Chatarina
