DILI, 16 Juñu 2026 (TATOLI)—Governu Timor-Leste liuhosi Grupu Traballu Reforma Setór Justisa ne’ebé iha Gabinete Primeiru-Ministru nia okos, loke hikas programa bolsa estudu ba joven timoroan sira-ne’ebé kontinua mestradu no doutoramentu iha área direitu iha Portugál.
Programa bolsa estudu ne’e fó-sai ofisialmente iha pájina Governu nian iha 15 Juñu 2026, iha-ne’ebé loke rejistu durante fulan ida, hahú hosi 16 Juñu to’o 16 Jullu 2026. Bolsa estudu ne’e ho objetivu atu haforsa kapasidade rekursu umanu nasionál nian, partikularmente iha apoiu ba dezenvolvimentu pesoál dosente ho kualidade iha Fakuldade Direitu Universidade Nasionál Timor Lorosa’e (UNTL).
Notísia relevante: Xefe Governu husu bolseiru na’in-51 estuda didi’ak hodi kontribui ba setór justisa iha TL – TATOLI Agência Noticiosa de Timor-Leste
Iha anúnsiu ofisiál, Governu fó-sai kuota bolsa estudu ne’e lima (5) ba programa mestradu no haat (4) ba programa doutoramentu. Destinatáriu bolsa-estudu sira hein atu kompromete atu serbí nu’udár dosente iha UNTL bainhira ramata sira-nia estudu.
Ba programa mestradu nian, aplikante sira tenke iha lisensiatura iha área direitu, hetan aseitasaun ka inskreve iha programa mestradu nian iha universidade ida-ne’ebé elejivel iha Portugál, no iha idade menus hosi tinan 35 iha momentu aplikasaun nian. Entretantu, aplikante ba programa doutoramentu presiza iha mestradu iha direitu, hetan aseitasaun ka inskreve iha programa doutoramentu iha Portugál, no ho idade tinan 40 mai kraik.
Governu subliña, selesionadu iha prosesu selesaun la garante automatikamente bolsa estudu. Prémiu bolsa estudu nian sei determina de’it hafoin kandidatu hetan ona aseitasaun ofisiál hosi universidade selesionadu iha Portugál.
Universidade sira-ne’ebé elejivel ba programa ida-ne’e inklui Fakuldade Direitu Universidade Lisboa nian, Fakuldade Direitu Universidade Portu nian, Eskola Direitu Universidade Minho nian, Fakuldade Direitu Universidade Coimbra nian, no Fakuldade Direitu Universidade Lisboa nian NOVA.
Kampu estudu sira-ne’ebé elijivel inklui Direitu Sivíl, Direitu Penál, Direitu Administrativu, Direitu Konstitusionál, Direitu Komersiál, Direitu Traballu, no Direitu Internasionál Públiku, ba nivel mestradu no doutoramentu.
Kona-ba kritériu, nota afirma katak aplikante sira tenke hatama karta aplikasaun ho lian Portugés ne’ebé dirije ba Koordenadór Grupu Traballu Reforma Setór Justisa, Lúcia Lobato, no hato’o ba Sentru Formasaun Jurídika no Judisiária (CFJJ). Dokumentu sira-ne’e tenke anexa prova aseitasaun ka matríkula iha universidade alvu, diploma akadémiku, identifikasaun, pasaporte, kurríkulu vitae, sertifikadu saúde, kartaun vasinasaun no deklarasaun karimbu ne’ebé konfirma validade dokumentu sira no vontade atu kumpre provizaun sira programa bolsa estudu nian.
Selesaun sei hala’o liuhosi avaliasaun ida kona-ba profisiénsia lian Portugés no Inglés no avaliasaun rekorde akadémiku. Komponente rua ne’e idaidak iha pezu ida ho pursentu 50. Kandidatu sira tenke hetan pontuasaun mínimu pontu 80 hosi totál 100 atubele konsidera nu’udár destinatáriu bolsa estudu nian.
Tuir oráriu ne’ebé estabelese ona, prosesu selesaun no avaliasaun sei hala’o iha 17-20 Jullu. Lista kandidatu sira-ne’ebé susesu sei fó-sai iha 22 Jullu. Entrevista sei hala’o iha 23-31 Jullu. Rezultadu preliminár sei fó-sai iha 03 Agostu. Lista finál ba destinatáriu bolsu estudu nian sei publika iha 31 Agostu 2026.
Programa ida-ne’e nu’udár parte ida husi Governu nia esforsu atu hametin setór justisa nasionál liuhosi hasa’e kualidade rekursu umanu no dezenvolve akadémiku jurídiku sira-ne’ebé iha kapasidade atu apoia reforma jurídika no institusionál sira iha futuru.
Jornalista: Osória Marques
Editór: Xisto Freitas da Piedade
