DILI, 15 agostu 2024 (TATOLI) –Primeiru-Ministru (PM), Kay Rala Xanana Gusmão husu bá bolseiru timoroan na’in-51 ne’ebé selesionadu hodi bá kontinua estudu iha Portugál atu estuda didi’ak, nune’e fila-fali mai kontribui bá setór justisa iha Timor-Leste (TL).
“Agora ita-boot sira hetan ona bola estudu tenke aproveita oportunidade ne’e ho di’ak, bainhira estuda hotu fila mai atu kontribui ba dezenvolve nasaun, tuir interese ita nia nasaun nian ba futuru,” PM Xanana hateten ba bolseiru sira iha nia intervensaun.
Nia husu ba bolseiru hirak ne’e, tenke estuda maka’as, hala’o estudu ho responsabilidade, estuda atu hatene hodi servi nasaun.
“Estudante sira, imi tenke estuda maka’as, estuda atu hatene, hatene hodi servi ita nia nasaun, la’ós servi tanba osan, maibé tenke iha nasionalizmu hodi servi. Ita-nia nasaun ne’e ema barak mak mate, fó sira nia isin hodi sosa ohin loron ita hetan independensia, imi jerasaun foun tenke aproveita oportunidade sira ho di’ak tanba imi mak sei kontinua lori nasaun ne’e ba oin,” Xanana tenik.
Iha biban hanesan, Koordenadora ba Grupu Reforma Justisa, Lúcia Lobato, hateten, programa bolsu estudu ne’e hetan aprovasaun husi Dekretu-Lei númeru 20/2024 loron 17 Abril, tuir análize situasionál ne’ebé dezenvolve husi Grupu Traballu bá Reforma Seitór Justisa.
Projetu ida-ne’e aliña ho programa Governu nian, hakarak forma jurista na’in 250-300 iha tinan 5-10 nia laran, ho objetivu atu prienxe lakuna sira formasaun nian bá profisionál sira iha setór ne’e maka juiz, prokuradór, defensór, advogadu, ofisiál polísia investigasaun kriminál nian, notáriu, rejistu, alfándega no seluk-tán.
Selesaun bá bolseiru sira ne’e hala’o hosi SFJJ, nu’udár selesaun ida ne’ebé rigorozu no sira ne’ebé aplika hamutuk na’in-267.
Aplikante hirak ne’e, na’in 48 mak selesionadu hodi estuda direitu no na’in-tolu (3) mak hili hodi estuda kona-bá medisina jurídika ho foku espesiál ne’ebé tau iha dominasaun bá lian Portugés no kandidatu sira-nia hakarak atu halo parte iha marku importante ida iha dezenvolvimentu sistema justisa iha TL.
Entretantu, Bolseira Dominica Lay, agradese ba IX Governu Konstitusionál partikularmente Primeiru-Ministru, Kay Rala Xanana Gusmão ne’ebé iha inisiativa hodi prepara futuru jerasaun no investe iha seitór edukasaun.
Iha ema hotu nia oin, bolseiru sira kompromete katak durante iha Portugal sira-nia misaun mak estuda, aprende no fila-fali mai Timor hodi dezenvolve seitór justisa.
“Ohin loron ida espesiál mai ami tanba bele hetan oportunidade ida ne’ebé ami la espera maibé ohin loron ami avansa ba oin. Iha Portugal ami sei utiliza oportunidade sira hotu ho di’ak, foku ba ami nia estudu atu bele remata fila fali mai servi ita nia rai-doben ida ne’e,” nia hakotu.
Serimónia despedida ne’e termina ho entrega prezente hanesan fotografia husi bolseiru sira bá Primeiru-Ministru Xanana Gusmão.
Partisipa iha serimónia despedida ne’e mai maka Ministru Justisa, Sérgio de Jesus Fernandes da Costa Hornai, Ministru Ensinu Superiór, Siénsia no Kultura, José Honório da Costa Pereira Jerónimo, korpu diplomátiku no família bolseiru.
Jornalista: Hortencio Sanchez
Editór: Florencio Miranda Ximenes
