PNDS konklui reabilitasaun estrada metru 370 iha Raifun-Foho
BOBONARU, 10 Novembru 2026 (TATOLI) – Perojetu reabilitasaun estrada Betaun iha aldeia Raifun-Foho, suku Raifun, postu administrativu Maliana, munisípiu Bobonaru, ne’ebé implementasaun husi Programa Nasionál Dezenvolvimentu Suku (PNDS) 2026 konklui ona ho totál distánsia metru 370.
Xefe Aldeia Raifun-Foho, Ramiro Bere Biti, hatete katak reabilitasaun estrada ne’e ramata 100% no komunidade hein katak iha futuru estrada ne’e bele hadi’a tan atu garante asesu ba transporte, liuliu durante tempu udan.
“Horisehik ha’u haruka sira cor halo hotu tiha ona. Agora bele uza”, nia informa ba Tatoli, ohin.
Ramiro haktuir katak estrada Betaun ne’e implementa iha pontu-pontu ne’ebé risku ba movimentasaun tranporte liuliu iha tempu udan.
“Estrada ne’e ami cor rohan-rohan de’it, ami buka ida risku ne’e mak cor. Kuandu udan kareta tama la di’ak, ne’e mak ami cor hotu. Tuir ami-nia haree, ida-ne’e la garante uza ba tinan naruk, ami presiza tenke halo hotu”, nia rekomenda.
Iha fatin seluk, Xefe Suku Raifun, Domingos Salvador, informa katak reabilitasaun estrada iha Raifun-Foho ne’e inklui distánsia metru 300, no aumenta tan adisionál metru 70 ba estrada besik merkadu ki’ik Ilibole, nune’e totál distánsia atinje metru 370.
Domingos Salvador subliña katak komunidade aldeia referida hili prioridade reabilitasaun estrada atu fasilita movimentasaun ba atividade ekonómika, sosiál, saúde no seluk tan ne’ebé sira presiza.
“Raifun-Foho ne’e estrada grave tebetebes, entaun iha 2016 ita halo valeta de’it, mai fali iha 2024 ita cor estrada Betaun. Agora 2026 mós ita cor nafatin estrada para bele fasilita lori produtu lokál bá merkadu no halo atividade seluk-seluk tan”, nia dehan.
Ba planu dezenvolvimentu tinan 2027, Domingos afirma katak suku Raifun sei fó prioridade ba konstrusaun sede komunitária iha aldeia Nunutanan, atu komunidade iha fatin apropriadu ba halibur malu no hala’o reuniaun.
“Durante ne’e, aldeia Nunutanan seidauk iha uma komunitária, nune’e bainhira hala’o reuniaun, sira uza xefe aldeia nia uma. Tanba ne’e, ami hili konstrusaun sede komunitária nu’udar prioridade ba tinan 2027, tuir matadalan PNDS”, nia salienta.
Domingos mós relata katak estrada husi Nunutanan bá Raifun-Foho tama ona iha planu Programa Dezenvolvimentu Integradu Munisípiu (PDIM) dezde 2024, maibé to’o agora komunidade seidauk haree implementasaun ba estrada ne’e.
Nune’e, populasaun kontinua hein atu planu reabilitasaun estrada ne’e bele implementa, hodi fasilita sirkulasaun no asesu ba transporte entre aldeia sira.
Tuir dadus monografia suku Raifun trimestre datolu tinan 2026, aldeia Raifun-Foho rejista uma-kain 60 ho totál abitante 261, kompostu husi feto 137 no mane 124.
Notísia relevante: Bobonaru lansa projetu PNDS 56 no konstrusaun sala refeitóriu 19
Jornalista: Sergio da Cruz
Editora: Maria Auxiliadora
