DILI, 17 Juñu 2026 (TATOLI)—Jogu primeiru Arjentina iha Grupu J iha Kopa Mundiál 2026 habiban oportunidade ba Kapitaun, Májiku Leonel Messi, Kuarta (17 Juñu 2026) ne’e, iha Kansas City Stadium, hodi marka hat-trick dahuluk hasoru Arjélia 3-0.
Ida-ne’e hanesan tulun Arjentina hadau vitória ida be kmanek, no ida-ne’e hanesan tada ida-ne’ebé úniku. Tanba, hakarak hatene, hat-trick ne’ebé Májiku MESSI bahat ne’e sai hanesan buat ne’ebé akontese dahuluk iha Kopa Mundiál 2026, bainhira maioria ekipa futeból sira husi nasaun seluk foin mak hala’o jogu dahuluk iha faze grupu nian.
Arjentina nu’udar Kampiaun Kopa Mundiál 2022 no Kapiataun Lionel Messi kontinua hatudu nia forsa hanesan futebolista hodi defende Argentina manán Arjélia 3-0 husi golu ne’ebé nia mesak prodús hodi hametin títulu kampiaun.
Bainhira jogu hahú, Arjentina konsege hakat liu hasoru Arjélia iha de’it minutu lima husi jogu ne’ebé halo presaun maka’as. Maibé, Lionel Messi nia golu la permite hafoin juiz da liña foti sa’e bandeira hatudu ofside.
Arjélia hafoin ne’e halo surpreza ida iha minutu ualu liuhusi Fares Chaibi. Maibé, hafoin revizaun VAR nian, golu ne’e mós esklui tanba offside durante atake.
Ritmu jogu sa’e maka’as liutan, Arjélia mós halo presaun maka’as maibé la hamate Arjentina nia vontade jogu atu luta ba mantein sira-nia títulu kampiaun ne’e.
Impase ne’e ikusmai kotu iha minutu 17 bainhira Arjentina halo kombinasaun ne’ebé di’ak iha kaixa penalidade nia oin. Rodrigo De Paul nia pasajen simu hasoru husi Messi ho remata bola ida-ne’ebé semo tama tama ba kantu guarda rede nian hodi muda rezulatdu 1-0.
Hafoin hetan lideransa, Arjentina kontinua kontrola jogu no domina iha pasajen. Messi koko nia sorte ho suta livre ida ho distánsia dook iha minutu 37, maibé bola semo dook sai husi ai-riin baliza nian ne’e.
Arjélia iha sira-nia oportunidade di’ak liu iha finál primeira parte nian. Jogadór Fares Chaibi konsege liberta suta perigozu husi kaixa penalidade nia laran, maibé guarda-rede arjentinu halo salva brillante hodi mantén eskoru 1-0 iha intervalu.
Lionel Messi mak sai hanesan estrela ba vitória Albiceleste nian, hodi marka golu tolu hotu iha jogu ne’e. Kapitaun arjentinu marka golu tolu hodi garante defeza kampeaun asegura pontu tolu hotu.
Husi rezultadu ne’e, Arjentina lidera Grupu J ho pontu tolu enkuantu nasaun sira seluk se zero hela.
Hakat ba segubda parte, Arjentina aumenta kedas presaun hafoin intervalu. Lautaro Martinez hetan oportunidade osan-mean iha minutu 54, maibé nia remata salva hosi Luca Zidane.
Liutiha minutu neen, Alexis Mac Allister kuaze duplika vantajen hosi Albiceleste. Maski nune’e, ninia esforsu ne’ebé hala’o hosi liur área penalidade ne’e hetan salvasaun hosi guarda-rede arjentinu.
Golu daruak ikus mai mosu iha minutu 60. Messi iha pozisaun ne’ebé loos hodi hatama bola ne’ebé namlele iha área penalti nia laran no sutu ba baliza nia klaran hodi fó vantajen ba Arjentina ho 2-0.
Arjélia luta hasoru no ameasa liuhosi jogadór Houssem Aouar iha minutu 69. Infelizmente, jogadór médiu ne’e nia suta sai dook de’it hosi parte karuk baliza Arjentina nian.
Jogu la’o ho ritmu maka’as liutan, nune’e Messi kompleta nia dezempeñu inkrível iha minutu 76. Simu pasajen ida hosi Nicolas Gonzalez iha área penalidade nia ninin, nia halo suta ida ba kantu kraik parte karuk hosi rede, hodi taka vitória Arjentina nian ho 3-0 no kompleta nia hat-trick.
Arjentina (4-3-3)
(23) Emiliano Martinez, (4) Gonzalo Montiel, (13) Cristian Romero, (6) Lisandro Martinez, (25) F. Medina, (7) Rodrigo De Paul, (20) A. Mac Allister, (24) E. Fernandez, (10) L. Messi, (22) Lautaro Martinez, (16) T. Almada.
Arjélia (4-3-3)
(23) L. Zidane, (15) Rayan Ait-Nouri, (21) A. Bensebaini, (2) Aissa Mandi, (17) R. Belghali, (19) Nabil Bentaleb, (22) I. Maza, (14) H. Boudaoui, (10) F. Chaibi, (9) Amine Gouiri, (11) Anis Hadj Moussa.
Falta golu ida, Messi nia golu bele liu Miroslav Klose
Lionel Messi marka istória foun iha mundu futeból tanba foin hahú jogu abertura ida iha Grupu J, Lionel Messi marka nia golu ba dala-16 iha mundiál, hodi halo hanesan ho rekorde ne’ebé mak ka’er husi jogadór alemaun Miroslav Klose, ne’ebé mak marka mós golu 16 iha nia kareira iha Mundiál.
Iha Grupu J, Messi marka golu tolu hasoru Arjélia iha minutu 17, 60, no 76. Golu sira-ne’e mós halakon maldisaun husi defeza kampeaun sira-nian ne’ebé sempre luta, maske lakon sira-nia jogu dahuluk sira.
Ho golu tolu ne’e, Messi lidera temporariamente korrida ba Bota Osan-Mean, ka markadór máximu ho golu tolu.
Messi hela golu ida atu estabelese rekorde ba golu barak-liu ne’ebé mak marka iha nia karreira tomak iha Tasa Mundiál.
Tasa Mundiál 2026 sei sai hanesan Messi nian ba dala neen, no Messi mós kaer rekorde ba jogadór ho idade boot-liu ne’ebé mak marka hat-trick iha Tasa Mundiál ida.
Messi, ne’ebé mak manán ona troféu hotu-hotu iha nia karreira profisionál, agora ho tinan 38. Mane ne’ebé antes ne’e joga ba Barcelona no Paris Saint-Germain ne’e moris iha loron 24 fulan Juñu tinan 1987.
Messi iha nafatin oportunidade barak hodi hatama tan golu, inklui hasoru ekipa rua seluk husi Grupu J mak hanesan Áustria no Jordánia.
Golu tolu husi Messi hasoru Arjélia hamosu mós rivalidade individuál ida ho Cristiano Ronaldo, ne’ebé mós buka tuir sira-nia jogu ba dala neen iha Mundiál 2026 nian.
La hanesan ho Messi, CR7 katuas liu ho tinan 41, maibé sai nafatin hanesan pilar ba Portugál no klube Al Nassr hosi Arábia Saudita. Durante nia karreira iha selesaun portugeza dezde 2003, nia joga ona dala 2-5 no marka ona golu 128.
Ronaldo bele halo komparasaun ho Messi nia golu tolu iha jogu abertura Grupu K nian hasoru Repúblika Kongo, Kinta (18 Juñu 2026) aban.
Jornalista : Hortêncio Sanchez
Editór : Cancio Ximenes
