DILI, 18 Juñu 2026 (TATOLI)—Diretór Jerál Sekretáriu Tékniku Administrasaun Eleitorál (STAE), Elviro Fernandes Moniz rekoñese oras ne’e stock out Tonner Ribbon, Transfer Filme no Blanku ID, maibé prosesu aprovizionamentu ba akizisaun iha ona faze finál.
“Loos duni, Tonner-Ribbon, Retransfere Filme no Blanku ID stock out tantu iha munisípiu no mós nasionál. Daudaun prosesu aprovizionamentu ba akizisaun Tonner Ribbon, Transfere Filme no Blanku ID iha ona faze finál. Se laiha impedimentu ruma semana oin asina ona kontratu ho kompañia fornesedór sira. Nune’e, espera iha Jullu materiál hirak-ne’e sei disponibilizadu iha munisípiu,” nia dehan ba TATOLI iha nia kna’ar fatin, Kaikoli, Dili, Kinta ne’e.
Totál alokasaun orsamentu ba akizisaun materiál hamutuk $990.533,33 ho nia deskrisaun atu sosa Blanku ID 662.000 pcs, Tonner-Ribbon ho unidade hamutuk 2.648 no Retransfere Filme unidade 883. Ida-ne’e sei fasilita operasionalizasaun atendimentu públiku resenseamentu eleitorál no atualizasaun baze dadus iha nivel postu administrativu no diáspora.
Notísia relevante: STAE halo RE-ABD ba kartaun biométriku hamutuk 352.710
Entretantu, tuir planu STAE nian katak ekipa téknika sei halo preparasaun ba estabelesimentu sentru no estasaun votasaun ba eleisaun prezidensiál iha 2027.
“Projesaun preliminária sentru votasaun iha territóriu nasionál hamutuk 1.838, estasaun votasaun hamutuk 1.967, iha diáspora sentru hamutuk 15 no estasaun votasaun hamutuk 15. Hosi projesaun númeru sentru votasaun no estasaun votasaun ida-ne’e nu’udár matadalan ba STAE hodi prepara planu lavantamentu dadus no preparativu elaborasaun Orsamentu Jerál Estadu 2027. Ne’e signifika katak sei bele iha mudansa númeru hirak-ne’e bainhira tékniku sira halo ona levantamentu dadus sentru votasaun iha terrenu,” nia dehan.
Elviro dehan projesaun númeru sentru votasaun no estasaun votasaun ba iha eleisaun prezidensiál 2027 iha aumentu kompara ho períodu kotuk de’it sentru votasaun 1.200 no estasaun iha 1.500 ho eleitór rejistadu hamutuk 859,613.
Nia dehan STAE halo hela enkontru koordenasaun prelimináriu ho autoridade munisipál, komandu PNTL munisipál, postu administrativu no lideransa komunitária sira hodi diskute nesesidade sira liga ba iha preparativu eleisaun nian inklui rekolla informasaun inisiál kondisaun sentru votasaun hanesan kondisaun jerál fasilidade sentru votasaun, asesu estrada ba iha sentru votasaun, asesu liña eletrisida iha sentru votasaun, asesu liña komunikasaun no situasaun seguransa einjerál iha lokalidade sentru votasaun.
Kona-ba sentru votasaun iha diáspora, STAE simu ona proposta husi ekipa tékniku Ministériu Negósiu Estranjeiru no Kooperasaun nian atu aumenta sentru votasaun ho intensaun atu hasa’e taxa partisipasaun eleitór sira iha eleisaun tuirmai. Maibé inisiativa ida-ne’e STAE sei aprezenta ba iha nivel ministériu atu diskute no tetu liga ho aspeitu jurisdisaun, legalidade, administrativu, diplomátiku, seguransa no tékniku.
Jornalista: Osória Marques
Editór: Xisto Freitas da Piedade
