BOBONARU, 18 Juñu 2026 (TATOLI) – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) apreende item 1.062 husi produtu alimentár, la’ós alimentár no tabaku ilísitu durante operasaun inspesaun no fiskalizasaun ne’ebé realiza durante fulan lima ikus ne’e iha munisípiu Bobonaru.
Operasaun ne’e realiza iha estabeslesimetu komersiál sira iha sidade Maliana no postu administrativu Kailaku, Bobonaru, Balibó no Lolotoe.
Diretora Operasaun AIFAESA, Claudinha Soares Pinto, hateten katak ekipa integrada hala’o kontrolu iha loja, kioske, loja fa’an eletrónika, farmásia, salon no barberia, ofisina fa’an pulsa EDTL, bein kunsumu, kafetaria, restaurante, no loja materiál konstrusaun.
Tuir nia, ekipa halo inspesaun bá estabelesimentu 388, ne’ebé komostu husi área komérsiu 368, turizmu 18 no industria rua. Husi númeru ne’e, ekipa deteta katak estabelesimentu 15 komete infrasaun no ekipa fó ona konvokatória ba estabelesimentu 12.
Notísia relevante: Janeiru-Juñu: AIFAESA identifika operadór ekonómiku hamutuk 373 komete infrasaun
“Totál produtu alimentár ne’ebé apreende hamutuk tipu 23 ho kuantidade item 817, produtu la’oó alimentár tipu 13 kuantidade item 107 no tabaku ilisitu tipu rua ho item 138. Totál produtu aprendidu hamutuk tipu 38 ho kuantidade item 1.062”, nia relata iha Maliana, tersa-feira ne’e.
Nia eslika katak infrasaun sira ne’ebé deteta inklui produtu liu prazu validade ho 34,78%, produtu estragadu 4,35%, falta rekizitu legál 8,70%, tabaku ilísitu 26,09%, lisensa kaduka 17,39%, pezu menus husi ne’ebé determina 4,35% no medida inferiór 4,35%.
“Totál infrasaun hamutuk 23. Maski infratór iha de’it 15, tanba loja ida dalaruma komete infrasaun rua ou tolu kedas, balun nia produtu ne’e espiradu tiha mak nia numeru infrasaun liu ne’e, maibé provizoriu ita halo konvokatóriu ho establesimentu 12 depois sira bá hasoru ekipa sira esplika kona-ba situasaun balun ne’ebé presiza esplika”, nia dehan.
Caludinha dehan atividade kontrolu ne’e importante atu garante siguransa ai-han, proteje saúde públika no asegura kualidade produtu sira ne’ebé komersializa iha merkadu.
“Ita tenke asegura katak produtu sira ne’ebé vende iha establesimentu ne’e seguru atu konsumu, halo regulasaun ba merkadoria atu garante katak medida inferiór ba iha ita-bo’ot sira nia produtu sira”, nia dehan
Sub-Inspetora Jerál AIFAESA, Quitéria da Costa, hateten katak produtu aprendidu hirak ne’e halo tiha ona destruisaun tanba konsidera katak risku ba saúde públika. Quiteira haklaken katak durante ne’e infrasaun relasiona ho tabaku ilísitu maka’as sei aas iha Bobonaru.
“Ha’u husu para ona sigarru ilísitu tanba ne’e kontra lei. Tinan ida-ne’e ami sei fó sensibilizasaun, más tinan oin ne’e ami fó ona koima, tenke selu taxa ba Estadu”, nia afirma.
Nia aumenta katak AIFAESA kontinua reforsa atividade fiskalizasaun regular liuhusi ekia ne’ebé koloka ona iha munisípiu.
Koima ba pagamentu voluntáriu varia husi $50 to’o $5.000, enkuantu multa iha prosesu normal hahú husi $225 to’o $500 tuir nia gravidade infrasaun.
Prezidente Autoridade Munisípiu Bobonaru, Paulo Moniz Maia, rekomenda ba propetáriu establesimentu komersiál sira atu labele fa’an produtu espiradu ka danifikadu tanba bele afeta ba ema nia saúde. Husu mósw atu hapara komersializsaun tabaku ilísitu tanba atividade ne’e bandu tuir lei.
“Se fa’an nafatin sasán liu prazu, fó sansaun tuir lei ne’ebé iha. Depois sé mak hakur bá sorin ilegalmente, ema ka’er nia, na’in responsabliza ninia aktu ne’ebé nia halo. Sigarru sira ne’e bandu tama husi sorin mai, tanba sigarru Timór nina iha tiha ona”, nia dehan.
Notísia relevante: AIFAESA konsidera importánsia laboratóriu alimentár bele redús teste amostra iha Indonézia
Jornalista: Sergio da Cruz
Editora: Maria Auxiliadora
