DILI, 18 Juñu 2026 (TATOLI)–Sekretária Estadu Formasaun Profisionál no Empregu (SEFOPE) hamutuk ho Governu Japaun liuhusi kompañia sira fó oportunidade servisu ba traballadór timoroan sira iha Japaun no sira sei rekruta tan ema na’in-1.000, ho rekezitu prinsipál mak kandidatu sira tenke iha koñesimentu lian japonés nivel N4.
Asesór Sekretária Estadu Formasaun Profisionál no Empregu (SEFOPE), Ilídio Ximenes da Costa, hateten kona-ba lingua Japaun parte japonés rekomenda atu sentru formasaun sira iha Timor-Leste hasa’e tan oras aprendizajen lian japonés, atu bele prepara traballadór barak liu hodi prienxe rekizitu servisu iha Japaun.
“Tan ne’e, sira rekomenda atu aumenta oras hanorin lian japonés iha sentru formasaun sira iha Timor-Leste,” Asesór Ilidio Ximenes da Costa hateten ba Agência TATOLI liuhusi telefónika, ohin.
Enkuantu, nia dehan, koñesimentu lian japonés nivel N4 mak nivel daruak husi kraik iha Japanese Language Proficiency Test (JLPT) ka Teste Profisiénsia Lian Japonés ne’ebé rekoñesidu internasionálmente.
Iha nivel ida-ne’e, partisipante sira espera atu bele komprende konversaun lorloron nian no lee ka komprende fraze simples sira-ne’ebé uza beibeik iha moris loro-loron no ambiente servisu.
Ilídio akresenta tan katak to’o agora daudaun iha ona partisipante hamutuk ema na’in-30 ne’ebé tuir hela formasaun lian japonés iha Sentru Formasaun Bekora, nu’udar preparasaun atu partisipa iha programa servisu no estajiu iha Japaun.
Aleinde ne’e, nia infroma, iha 16 Juñu 2026 ne’e, nia akompaña Diretór Diresaun Nasionál Empregu Estérior (DNEE), João Correia, hodi simu no halo enkontru ho delegasaun husi kompañia no instituisaun oioin iha Japaun iha City 8, Manleuana Dili.
“Delegasaun ne’e kompostu husi Murakami Makoto no Mosu Nobuhito husi Murakami Construction, Katsu Yuzo husi Greentec Japaun, no Fukusaki Yasushi no Fujita Tatsushi husi Reimei Jigyo Kyodo Kumiai,” nia hateten ba Agência TATOLI liuhusi telefónika, ohin.
Durante enkontru, nia dehan, Murakami Construction ne’ebé bazeia ba Prefeitura Kagoshima informa katak husi kandidatu hitu (7) ne’ebé tuir teste iha loron 15 Juñu 2026, ema na’in-rua konsege liu selesaun atu servisu iha área konstrusaun sivíl no konstrusaun ponte liuhusi Programa Technical Intern Training (TIT).
“Murakami Construction rekruta ona kandidatu rua (2) husi ema na’in-hitu (7) ne’ebé tuir teste ba área konstrusaun sivíl no ponte,” Asesór ne’e dehan.
Nia esplika, kompañia japonés sira-ne’ebé partisipa iha enkontru ne’e mós hato’o sira-nia planu atu rekruta traballadór timoroan hamutuk ema na’in-1.000 iha futuru. Maibé, atu atinje objetivu ne’e, presiza aumenta númeru kandidatu sira-ne’ebé domina lian japonés.
Aleinde enkontru ho SEFOPE no DNEE, delegasaun japonés ne’e mós halo vizita ba Sentru Formasaun Bekora no Sentru Formasaun Tibar atu haree rasik fasilidade sira, prosesu aprendizajen no prontidaun sentru formasaun sira atu prepara rekursu umanu Timor-Leste.
Vizita ne’e espera bele hametin tan kooperasaun entre Timor-Leste no Japaun iha área empregu no dezenvolvimentu rekursu umanu, no mós loke oportunidade servisu barak liu ba juventude timoroan iha merkadu traballu internasionál.
Jornalista : Alexandra da Costa
Editór : Cancio Ximenes
