DILI, 02 Jullu 2026 (TATOLI) – Prezidente Institutu Nasionál Kombate HIV/SIDA (INCSIDA), Daniel Marçal, husu autoridade no parte seguransa atu halo kontrolu makaas ba SPA, fatin masajen no otél sira hodi prevene transmisaun HIV/SIDA iha Timor-Leste.
Diretór ne’e hateten kontrolu ne’e importante tanba aktividade sexu tranzasional barak mak la’o hela iha fatin masajen, otél no SPA sira.
Nia dehan sexu tranzasional iha fatin sira hanesan ne’e bele kontribui ba aumentu transmisaun HIV aas iha Timor-Leste.
Tuir Dniel, atividade seksuál iha fatin hirak ne’e konserteza envolve prátika seksuál ne’ebé la seguru, no ida-ne’e fó risku boot ba transmisaun HIV.
Nia reafirma maski kombate HIV/SIDA sei enfrenta dezafiu barak, INCSIDA kontinua iha kompromisu atu halo kampaña sensibilizasaun iha área rurál no instituisaun edukasaun iha munisípiu hotu.
Programa sira ne’e atu hasa’e koñesimentu komunidade, juventude no estudante sira atu prevene-an husi HIV.
HIV mak vírus ida ne’ebé ataka sistema imunidade ema nian, liuliu selula CD4, ne’ebé iha funsaun atu proteje isin-lolon hasoru moras. Bainhira sistema imunidade ne’e fraku, HIV sei dezenvolve ba SIDA, ne’ebé mak faze ikus husi moras ne’e.
HIV da’et liuhosi relasaun seksuál la ho prezervativu, uza seringa hamutuk, no transmisaun vertikál husi inan ba oan durante isin-rua.
To’o agora seidauk iha aimoruk atu kura HIV, maibé tratamentu antirretroviral (ARV) bele ajuda ema moras sira moris naruk no reduz risku transmisaun ba ema seluk.
Jornalista: Camilio de Sousa
Editór: Filomeno Martins
