DILI, 01 Jullu 2026 (TATOLI) – Reprezentante komunidade peskadór Bebonuk, Francisco dos Santos Lopes da Cruz, husu Governu, liuhusi Ministériu Agrikultura, Pekuária, Peska no Floresta (MAPPF), atu fasilita ekipamentu peska hodi ajuda peskadór sira hasa’e produtividade no rendimentu, nune’e bele sustenta moris família.
Francisco hateten katak desde Timor-Leste hetan ukun-an to’o agora, komunidade peskadór iha Bebonuk seidauk simu apoiu ekipamentu peska ruma husi Governu.
“Ami, peskadór Bebonuk, durante ne’e seidauk simu ekipamentu peska ruma husi Governu. Ami mak sosa rasik ró, redi no makina motor atu uza ba kaer ikan, depois faan hodi sustenta nesesidade família no selu oan sira nia eskola,” dehan Francisco ba TATOLI iha tasi-ibun Bebonuk, Dili, kuarta ne’e.
Nia hateten, maski Governu troka malu dala barak ona, peskadór sira iha Bebonuk seidauk hetan apoiu ekipamentu peska hanesan ne’ebé promete tiha ona.
“Dala barak Governu liuhusi MAPPF mai visita no halo enkontru ho ami. Sira promete atu apoiu ami ho ró, makina motor, redi no ekipamentu relevante seluk ba atividade peska, maibé to’o agora ami seidauk simu,” nia dehan.
Francisco hatoo katak komunidade peskadór Bebonuk sente triste tanba Governu distribui ekipamentu peska ba peskadór sira iha munisípiu no área seluk, maibé sira rasik seidauk hetan benefísiu ne’ebé hanesan.
“Ami dala barak haree iha Rádio no Televizaun Timor-Leste (RTTL) katak Governu liuhusi Sekretaria Estadu Peskas fahe ró, redi no makina motor ba peskadór sira iha munisípiu sira. Maibé ami, peskadór Bebonuk, tinan ba tinan seidauk hetan ekipamentu sira ne’e,” nia salienta.
Tanba ne’e, nia husu Governu, liuhusi MAPPF, atu konsidera komunidade peskadór Bebonuk no fasilita ekipamentu peska atu ajuda sira aumenta produsaun kaer ikan no hasa’e rendimentu família.
“Karik Governu bele ajuda deit ró no makina motor atu fasilita ami ba kaer ikan iha tasi. Redi, tali, kail no ekipamentu ki’ik seluk ami bele sosa rasik,” Francisco akresenta.
Francisco hateten katak maioria komunidade iha tasi-ibun Bebonuk depende ba atividade peska atu sustenta moris loroloron.
“Kuaze uma-kain 100 resin iha tasi-ibun Bebonuk ne’e moris ho peska. Kada família esforsu rasik sosa ekipamentu atu ba kaer ikan no faan hodi sustenta moris no haruka oan sira ba eskola,” nia konklui.
Jornalista: Camilio de Sousa
Editór: Filomeno Martins
