DILI, 06 Jullu 2026 (TATOLI)—Eskritór Felismino Soriano da Costa, informa Ajénsia Notisioza TATOLI, I.P. eziste tinan sanulu (10) ona, tan ne’e presiza halo kobertura mós iha área rurál ne’ebé jornalista TATOLI seidauk destaka ba.
Eskritór ho idade 26 ne’e dehan preokupasaun no difikuldade iha área rurál barak liu, ne’ebé povu enfrenta maibé Governu lahatene. Ida-ne’e mídia nia kna’ar no nia papél oinsá bele kanaliza informasaun liuhusi kanál mídia.
“Ha’u baibain asesu informasaun iha Ajénsia TATOLI ne’e di’ak tebes. Maibé, buat ida ha’u sujere mak atu kobre mós iha foho ka área rurál sira, labele hamout de’it iha kapitál tanba dalaruma povu nia lian la to’o mai nivel nasionál,” nia dehan ba TATOLI iha Dili, foin lalais ne’e.
Tanba ne’e, nia rekomenda ba mídia liliu Ajénsia TATOLI presiza destaka nia jornalista ba munisípiu ne’ebé seidauk iha.
“Foti informasaun iha área rurál nune’e nasionál bele buka solusaun. Agora kobre de’it iha nasionál, foho sofre nafatin ba dezenvolvimentu tanba laiha informasaun,” nia dehan.
Kona-ba publikasaun notísia, Ajénsia TATOLI fó-sai informasaun ne’ebé edukativa no iha nia solusaun.
“Ba ha’u, Ajénsia TATOLI fó-sai informasaun ne’ebé la hamosu provokasaun iha-ne’ebá hanesan ho mídia seluk. Tanba iha mídia balun soran fali líder sira. Ida-ne’e ladi’ak. Mídia tenke edukativu no buka solusaun ba públiku. Entaun, hakarak apela ba joven ka estudante sira atu di’akliu asesu Ajénsia TATOLI tanba iha-ne’ebá informasaun kredivel no ho lian haat,” Felismeno tenik.
Enkuantu, Sekretáriu Estadu Arte no Kultura, Jorge Soares Cristovão apela ba jornalista sira atu kontinua servisu profesionál.
“TATOLI hahú moderniza informasaun iha nia publikasaun sira,” SEAK Jorge esplika.
Sekretáriu Estadu parabeniza Ajénsia TATOLI ne’ebé halo nia aniversáriu ba da-X ho publikasaun ne’ebé kontinua kobre ba dezenvolvimentu nasionál.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, indepedente, inzenta, klareza no nafatin iha integridade no mós kredibilidade.
Jornalista: Osória Marques
Editór: Xisto Freitas da Piedade
