DILI, 06 Jullu 2026 (TATOLI)—Atakante selesaun nasionál Brazil, Neymar, idade 34, ofisialmente tara xuteira no hatudu ninia The Last Dance hafoin lakon husi Noruega ho golu 1-2 iha jogu jornada 16 Kopa Mundiál 2026, Segunda (06 Jullu 2026) oras Timor-leste.
“Ha’u koko. Ha’u koko. Agora hotu ona. Ha’u hahú iha ne’e no ha’u sei ramata iha ne’e,” Neymar hatete ba Globo hafoin jogu ramata.
Husi liafuan ne’e, ofisialmente konfirma atu reforma ka tara xuteira husi selesaun nasionál Brazil hafoin Kopa Mundiál 2026 ne’e termina.
Neymar halo nia estreia iha Brazil iha estádiu hanesan iha fulan-Jullu 2010 hasoru Estadu Unidu Amérika.
Neymar mak markadór di’ak liu iha Brazil ho golu 80 iha jogu 130, nune’e ida-ne’e aas liu Pele nia golu 77 no só diferesna de’it mak Pele lori selesaun nasionál manán Kopa Mundiál dala tolu no Neymar la kosege halo ida-ne’e.
Durante nia hamutuk ho Selesaun Nasionál, Neymar kontribui títulu prestijiadu rua mak Tasa Konfederasaun 2013 no medalla osan-mean Olímpiku 2016. Maibé, nia la konsege manán Kopa Amérika ka Kopa Mundiál.
Neymar tanis hafoin jogu Brazil nian hasoru Noruega iha jogu 16 Kopa Mundiál 2026 nian. Nia la konsege lori Selesaun Nasionál ba ronde tuir mai, ne’ebé mós hakotu nia kareira internasionál.
Brazil lakon ho 2-1 iha jogu ida-ne’ebé nakonu ho drama iha Estádiu Nova Iorke Nova Jersey nian iha East Rutherford, Segunda madrugada, oras Timor-Leste nian.
Erling Haaland nia golu rua ne’ebé hatama iha finál segunda parte sai hanesan mehi aat ida ba ekipa Carlo Ancelotti nian.
Neymar, ne’ebé foin mak tama iha meiu segunda parte, konsege marka penalidade iha tempu adisionál.
Maibé, ida-ne’e hanesan de’it konsolasaun momentu ida tanba jogu ne’e remata lakleur depois. Ba dala uluk dezde tinan 1990, Brazil sai hosi jogu 16 hosi Kopa Mundiál 2026.
Deziluzaun ne’e sai evidente iha jogadór sira nia oin, ekipa treinadór sira, no apoiante brazileiru sira. Ema barak tanis, inklui Neymar. Nia liman nakdedar bainhira nia reza tanba nia tristeza ne’ebé maka’as.
Jornalista : Hortêncio Sanchez
Editór : Cancio Ximenes
