OEKUSI, 07 Jullu 2026 (TATOLI) – Konstrusaun uma dignu ne’ebé destina ba família kbiit la’ek, Yohanes Seno, iha aldeia Cabana, suku Suni-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA), husik abandonadu hela durante fulan lima ona.
Xefe Suku Suni-Ufe, Crisanto Tamele, rekomenda ba Governu atu fó atensaun sériu ba kestaun ne’e, tanba fatuk-inan ba projetu ne’e hatuur ona dezde loron 11 Janeiru 2026, maibé to’o ohin loron obra ne’e paradu totál.
“To’o ohin mós ha’u seidauk hetan informasaun klaru, tanba antes ne’e Governu halo ona lansamentu iha loron 11 fulan-Janeiru liubá, liuhusi Vise-Primeiru-Ministru no Ministru Dezenvolvimentu Rurál no Habitasaun Komunitária, to’o ohin kompleta fulan-lima ona maibé obra husik de’it, ne’ebé ha’u mós la hetan informasaun husi parte relevante sira, maibé sempre koordena mai Autoridade RAEOA karik iha kompeténsia bele liga direita ba nasionál, tanba benefisiáriu kontinua hein to’o ohin loron,” Xefe Suku ne’e hato’o ho preokupasaun.
Notísia relevante:Ministru Asanami hatuur fatuk dahuluk konstrui uma dignu iha suku Suni-Ufe Nítibe
Klarifikasaun RAEOA
Hatan ba kestaun ne’e, Prezidente Autoridade RAEOA, Régio da Cruz Salu, rekoñese katak projetu ne’e tarde duni. Nia esplika katak retardamentu ne’e akontese tanba fallansu iha dezeñu tékniku, maske fundu orsamentu hamutuk rihun $45-resin aloka ona liuhusi Diresaun Rejionál Serbisu Finansa RAEOA.
“Dezeñu finál ha’u foin simu iha fulan kotuk, uluk aprezenta dezeñu primeiru maibé la kondis, ne’ebé husu ona tékniku sira atu ba foti dezeñu iha Gabinete Vise Primeiru-Ministru no Ministru Dezenvolvimentu Rurál no Habitasaun Komunitária, maibé dezeñu mai ne’e ha’u la aseita, tanba totálmente la kondis ho saida mak aplika husi ministériu,” Régio da Cruz Salu esplika.
Nia haktuir mós katak materiál balu hanesan tizolu (batako) hatuun ona iha fatin, maibé kualidade no padraun tenke bazeia ba verifikasaun Obra Públika.
“Tanba ita lansa ona, entaun tenki hahú ona ho dezeñu, defaktu materiál hanesan bataku hatuun ona, sé autoridade lokál sira kestiona, ne’e loos maibé ita tenke asegura kestaun tékniku, ita labele ba tidin arbiru dezeñu tenki tuir padraun no verifikadu no tenki aprova husi Obra Públika.”
Esperansa no sentimentu benefisiáriu nian
Antes ne’e, Jornalista Ajénsia TATOLI,I.P, konsege entrevista ho benefisiáriu Yohanes Seno, iha suku Suni-Ufe, nia sente haksolok tanba Governu bele apoia uma fatuk ida, nune’e bele hela ho dignu.
“Ha’u kontente tanba Governu hanoin ha’u, ha’u selu labele tanba apoia ha’u uma fatuk ida, durante ne’e ha’u hela de’it iha ha’u-nia uma tinan barak ona, kondisaun mós ita haree rasik, tanba ha’u laiha buat atu hadi’a ha’u-nia uma, oras ne’e ha’u ho ha’u-nia kaben, ami naʼin-rua laiha ona forsa atu hadi’a ami-nia moris, maibé tanba Maromak nia grasa, liuhusi Governu ida-ne’e la taka matan mai ha’u, ha’u sente kontente tebes,” nia hato’o ho laran orgullu no haksolok.
Rekorde fali katak, iha tinan-2024, Ministru Dezenvolvimentu Rurál no Abitasaun Komunitária implementa ona projetu uma dignu faze dahuluk hamutuk unidade 90, ne’ebé kobre munisípiu Lautein, Manufahi, Manatutu, inklui RAEOA, ho totál fundu hamutuk millaun $4-resin.
Jornalista: Abílio Elo Nini
Editór: Rafael Ximenes de A. Belo
