OEKUSI, 11 Janeiru 2026 (TATOLI) – Vise Primeiru-Ministru no Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Asanami Sabino, domingu ne’e hatuur fatuk dahuluk hodi konstrui uma dignu ba kbiit la’ek Yohanes Seno iha aldeia Kabana suku Suni-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA).
Iha ámbitu ne’e, Vise- Primeiru-Ministru informa, kontrusaun uma dignu ne’e, nu’udar polítika IX Governu konstitusionál, ne’ebé implementa hosi Ministériu Dezenvolvimentu Rurál no Abitasaun Komunitária, hanesan mós projetu pilotu ida ba munisipíu sira.
“Ita tau fatuk primeiru ba uma dignu nian, ita hakarak hadi’a família ne’e, nu’udar kbiit laek ida iha suku ne’e nian. Tanba ne’e, ha’u reprezenta Maun-Boot Primeiru-Ministru, atu husu nafatin inan-aman sira atu hamutuk kontribui ba ita-nia prosesu dezenvolvimentu iha suku, lakle’ur tan ita-nia estrada sira sei kontinua hadi’a tan nafatin, ita haree tama ona to’o Kabana, nune’e inan-aman sira bele asesu ho transporte ne’ebé di’ak no dignu,” nia hateten iha aldeia Kabana.
Notísia relevante:Governu sei troka linguajen Uma Kbiit Laek ba Uma Naroman ba Povu
Governante ne’e, rekomenda ba autoridade komunitária sira iha suku Suni-Ufe atu kontinua tau matan família kbiit laek ne’ebé laiha ona forsa, bele alista, ba futuru Governu liuhusi Ministériu Dezenvolvimentu Rurál bele konsidera.
“Apresia tebes ba xefe suku no xefe aldeia sira, ami mai husi Ministériu Dezenvolvimentu Rurál, mai kedas ho administrasaun sira Diretór Jerál, ne’ebé kontinua halo koordenasaun, karik ba oin haree ba família ne’ebé presiza tebes dezenvolvimentu rurál tama, ita bele fó apoia serbisu balu,” nia apela.
Notísia relevante:Ezisténsia MDRHC kontribui ba dezenvolvimentu rurál
Iha biban ne’e, Xefe Suku Suni-Ufe, Crisanto Tamele, hato’o satisfasaun ba Governu, tanba bele konsidera pedidu ne’ebé propoin husi suku, hodi apoia uma dignu família kbiit laek ida iha suku Suni-Ufe.
“Nu’udar autoridade lokál agradese no obrigadu Governu no matebian sira, tanba bele tau matan ba família kbiit laek ne’e, atu moris dignu hanesan família sira seluk,” nia orgullu.
Sentimentu ksolok ne’e hanesan mós Yohanes Seno, nu’udar benefisiáriu, sente kontente tanba Governu bele apoia uma fatuk ida, nune’e bele hela ho dignu.
“Ha’u kontente tanba Governu hanoin ha’u, ha’u selu labele tanba apoia ha’u uma fatuk ida, durante ne’e ha’u hela de’it iha ha’u-nia uma tinan barak ona, kondisaun mós ita haree rasik, tanba ha’u laiha buat atu hadi’a ha’u-nia uma, oras ne’e ha’u ho ha’u-nia kaben, ami na’in-rua laiha ona forsa atu hadi’a ami-nia moris, maibé tanba Maromak nia grasa, liuhusi Governu ida-ne’e la taka matan mai ha’u, ha’u sente kontente tebes,” nia orgullu.
Notísia relevante:PNDS lansa fatuk dahuluk ba projetu dada bee-moos ba uma-kain 40 iha Bobokase
Jornalista: Abílio Elo Nini
Editór: Rafael Ximenes de A. Belo
