BOBONARO, 30 agostu 2022 (TATOLI)- Ministru Administrasaun Estatál, Miguel Perreira de Carvalho, sei altera linguajen Uma Kbiit Laek (UKL) ba ‘Uma Naroman ba Povu’ tanba faktu hatudu maioria povu iha Timor-Leste iha kbiit hodi atende ba nesesidade loron-loron.
Ministru Miguel hato’o kestaun ne’e iha ámbitu lansamentu fatuk dahuluk ba konstrusaun Uma Kbiit Laek (UKL) + kategoria (A) hamutuk unidade 75, iha Baudut-Mean, suku Cowa, postu administrativu Balibo, munisípiu Bobonaro segunda ne’e.
Notísia relevante: MAE hatuur fatuk dahuluk UKL+ A unidade 75 iha Balibo
“Programa ida-ne’e iha tempu badak ha’u sei troka nia naran, hosi UKL + ba Uma Naroman ba Povu, tanba ita-boot sira-ne’ebé sai benefisiáriu ne’e, uma mak naran kbiit laek, maibé imi sira la kbiit laek ida mak ne’e, ita-boot sira-ne’e kbiit mak ohin loron moris hela,” nia hateten iha intervensaun.
Tuir nia, tinan 20-resin ona Timor-Leste ukun rasik-aan hosi invazaun Indonézia hodi hamriik iha mundu nia leet hanesan nasaun Repúblika Demokrátika ida-ne’ebé konstrui hosi sakrifísiu povu tomak nia ho objetivu atu moris goja ho ninia rikusoin rasik.
Maibé realidade dezde independénsia to’o agora mehi hirak-ne’ebé iha tinan 20 ba kotuk povu hotu mehi sei la sai realidade.
Tanba ne’e governu implementa programa UKL ne’ebé sei transforma fali ba Uma Naroman ba Povu ho objetivu hakarak atu hasai povu hosi nakukun lori ba naroman.
Governante ne’e akresenta, tuir dadus sensu idetifika katak totál populasaun iha teritóriu nasionál hamutuk rihun 200 mak kondisaun uma ladi’ak.
Ne’e duni governu hamosu programa UKL atu korresponde ba objetivu ne’ebé povu hotu hakarak hosi rezultadu independénsia ne’ebé deside liuhosi pregu.
“Tinan kotuk ita halo 1.200 de’it, tinan ne’e halo kala 5000, ne’e falta hira tán mak sei bele halo, sei presiza halo barak liután, imi iha-ne’e kontente ona ida rua tanba hetan ona, ita halo dezenvolvimentu neineik-neneik to’o tempu ruma ema hotu sei sai di’ak,” nia dehan.
Notisia relevante: 29 agostu, MAE sei lansa konstrusaun UKL+ tipu A iha Balibo
Jornalista: Sérgio da Cruz
Editór: Evaristo Soares Martins
