OÉ-CUSSE, 14 Agostu 2024 (TATOLI) – Programa Nasionál ba Dezenvolvimentu Suku (PNDS), Rejiaun Administrativa Espesiál Oé-Cusse Ambeno (RAEOA) hamutuk ho autoridade lokál sira, hatuur fatuk dahuluk ba projetu dada bee-moos, ne’ebé utiliza bomba gravitasaun bee, ba família 40 iha bairru Sikone, aldeia Fatubija’e, suku Bobokase, sub-rejiaun Pante Makasar.
Diretór PNDS Oé-Cusse, João Bobo, informa katak projetu ne’e nu’udar siklu daneen, ne’ebé nia verba mai husi Orsamentu Jerál Estadu 2024 no projetu ne’e tenke finaliza iha fulan-Novembru, nune’e bele fasilita komunidade sira asesu bee.
“Lansamentu ohin ne’e ita hahú ho siklu daneen ba suku Bobokase nian. Projetu ne’e halo kanalizasaun bee, ita sei uza tan mákina bomba ida atu-bele fornese bee ba to’o komunidade nia uma, signifika ita hahú ho gravitasaun depois atu dada. Presiza mákina gravitasaun rua atu fornese mai to’o komunidade sira-nia hela fatin”, João Bobo hateten iha suku Bobokase.
Nia informa katak orsamentu 2024 ba PNDS nian aloka ba infraestrutura, espesialmente ba iha suku Bobokase hamutuk $44.250, maibé fahe ba rua – ida mak ba projetu bee-moos ne’ebé daudaun halo ona lansamentu no seluk mak ba projetu harii muru protesaun iha klínika suku Bobokase ho valór rihun $22-resin.
Xefe suku Bobokase, Tomás Nesi, agradese ba Governu, tanba liuhusi projetu PNDS komunidade sira ne’ebé tinan barak enfrenta falta bee-moos bele asesu ona bee. “Tanba ne’e, ami orgullu no ami-nia komunidade prontu kontribui ba projetu ida-ne’e atu la’o ho susesu”, nia promete.
Notísia relevante: PNDS Oé-Cusse sei ezekuta rihun $930-resin atu finansia programa 16
Sentimentu ksolok hanesan mós hato’o husi Bergita Oqui, nu’udar rezidente bairru Sikone, tanba kuaze tinan barak ona iha bairru referidu enfrenta problema bee-moos.
“Governu bele hakbesik bee-moos iha ami-nia hela fatin, tanba tinan barak ona ami tenke la’o do’ok hodi kuru bee. Agora mak hanoin ami mai halo tanke atu dada bee mai ami atu uza hodi atende ami-nia nesesidade moris”, katak.
Notísia relevante: PNDS Oé-Cusse realiza formasaun iha área tolu mellora servisu iha baze
Projetu gravitasaun bee-moos ne’e ezekuta husi empreza Marhoit Unipesoál Lda. ho valór kontratu $22.143 ho durasaun fulan tolu, hahú Agostu to’o Novembru 2024.
Jornalista: Abílio Elo Nini
Editora: Maria Auxiliadora
